Mga dalan sa Talisay nga gubaon ipasemento na

CEBU, Philippines - Gipahibawo ni Talisay City Mayor Johnny Delos Reyes nga sugdan na sa iyang buhatan ang pagsemento sa mga kadalanan sa syudad nga gubaon ug lubaklubakon sulod niining tuiga.

Kini human nipasar  og resolusyon   ang mga membro sa konseho sa syudad nga naghatag kaniya og pagtugot nga makapatuman sa nahisgutang proyekto nga dugay nang gipaabot sa taga Talisay.

Matud pa sa mayor nga sa labing daling panahon iyang ipahigayon ang bidding sa mga contractor nga maoy mopatuman unya sa nahisgutang proyekto.

Subay niini giawhag sa mayor ang mga kontraktor sa Talisay ug ubang mga lugar nga mosumiter sa ilang proposal aron masugdan usab dayon sa Bids and Awards Committee sa syudad ang gikinahanglanong bidding alang sa dali nga pagpatuman sa maong proyekto.

Si Assistant City Engineer Dr. Gamaliel Vicente niingon nga sa higayon nga masugdan sa sayu-sayo ang pagtrabaho  sa maong proyekto hayan mahapsay  usab ang mga nagkadaiyang kadalanan sa syudad ilabina sa mga lugar nga kanunay nga bahaan matag bunok sa ulan.

Sutaon usab sa Engineering Department ang mga lugar nga ilang unahon sa pag-ayo ilabina niadtong mga major thorough fares nga maoy sagad nga agian sa mga pribado ug publikong mga sakyanan ilabi na sa mga dagkong mga trak nga maoy sagad makaguba sa kadalanan. (BANAT NEWS)