CEBU, Philippines - Usa ka job order mag-atubang og imbistigasyon human kini pasanginli nga nani-on og pusil sa kauban niyang JO nga sakop sa Fishermen Sea and Ecological Care (FISECA) sa barangay Cansojong, dakbayan sa Talisay sa miaging buntag.
Ang suspetsado mao si Ritche Roritos, hingkod, taga barangay Cansojong, Talisay, giingong JO usab sa FISECA nga ubos sa liderato ni Arturo Aras. Ang biktima mao si Herminigildo Villegas, hingkod usab nga taga barangay San Roque, Talisay ug sakop usab sa FISECA ubos sa liderato ni Gregorio Dela Torre.
Si Villegas mi-report sa Talisay City Police Station bahin sa maong insidente.
Giingong mga alas 9:00 sa buntag si Roritos uban sa personnel sa buhatan sa mayor miadto sa buhatan sa FISECA sa barangay Cansojong aron unta mangutana kun unsay problema sa ilang buhatan.
Gikataho nga ang FISECA gibahin na sa duha ka grupo nga nagkalainlain og lider.
Giingong si Joel Vega kinsa sakop ni Dela Torre ug Roritos nakabaton og init nga lalis ug diha-diha milanit sa iyang armas si Roritos ug gition kang Vega.
Aron kalikayan ang kagubot giuwang ang duha sa mga kauban ni Vega lakip na si Villegas kinsa giingong gitionan usab ni Roritos sa iyang armas de fuego.
Nunot niini, si Konsehal Antonio Bacaltos, Jr. chairman sa committee on environment nagkanayon nga mopahigayon siya og imbestigasyon sa maong insidente.
Gawas niini gitakda usab niyang ipaabot ngadto sa mayor ang maong problema sa tinguha nga maundang na ang pagbahinbahin og grupo sa FISECA aron wala nay kagubot nga motumaw.
Gani tungod sa mga reklamo sa mga mananagat batok kang Aras si Dela Torre gibalik sa iyang posisyon isip hepe sa FISECA. (BANAT NEWS)