Gikan naligo sa dagat gikaligo og bala patay

CEBU, Philippines - Patay ang usa ka tawo nga gikan pa nga nangaligo sa dagat kuyog sa duha ka mga kauban nga lalaki dihang kalit lang gipusil sa armadong lalaki nga nagsakay og motorsiklo sa national highway sa sitio Fatima sa barangay Jubay, lungsod sa Liloan alas 4:30 ang takna sa hapon niadtong miaging adlaw.

Si SPO4  Winry Pilapil sa kapolisan sa maong lungsod miila sa namatay nga  mao si Eduardo Sungahid Jr., 32, taga sitio Kalubihan II sa barangay Umapad sa dakbayan sa Mandaue.

Ang nagpusil  nga wala hiilhing lalaki nagsakay og XRM Honda nga motorsiklo nga kolor midnight blue nga nagsul-ob og closed-type helmet, nag-jacket og maong ug nag-shortpants usab og maong.

Matud pa ni Pilapil nga gikan pa nga nangaligo sa dagat ang biktima kuyog sa duha ka mga kauban nga mga higala nga lalaki ug nagbarog kini sa daplin  sa karsada sa pagpaabot og sakyanan alang na sa pagpamauli.

Ang nagbinugtong nga lalaki nga kalit lang mihunong sa pagtungod gyud sa biktima kalit lamang niining mipusil sa makadaghang higayon nga maoy nakaingon sa mga samad pinusilan nga naangkon sa ulo ug uban pang bahin sa iyang kalawasan.

Human sa maong pagpamusil dali usab nga mipabulhot ang wala hiilhing lalaki sa giluwanan niining motorsiklo padulong sa dakbayan  sa Sugbo ug  ang biktima dali nga gihatod sa mga kauban sa district hospital sa maong lungsod apan gideklarar kini sa mga doktor nga dead on arrival.

Lima ka mga kabhang sa armas nga kalibre .45 ang nakuha sa maong crime scene. (/EIM)(BANAT NEWS)