CEBU, Philippines - Namatay ang usa ka sakop sa Phil. Navy human kini pusila sa wala hiilhing tawo didto sa BM Demataga st., Brgy. Poblacion dakbayan sa Lapu-Lapu sa milabay’ng gabii.
Ang biktima mao si PO2 Edwin Orbanos Leogan, 38, minyo, lumad sa 2nd St. Brgy. Kamuning, Quezon City usa ka sakop sa Phil. Assault Craft Forces sa Phil. Navy.
Sa pasiunang imbestigasyon ni PO3 John Carlo Jocutan, nasuta nga gidudahang pangabubho ang usa sa hinungdan ug motibo sa maong krimen.
Nasayran nga sa alas 7:00 ang takna sa milabay’ng gabii adunay kasabot si PO2 Leogan sa usa ka motel sa maong dapit apan dali kining migawas kay ang kasabot niini wala motunga.
Gumikan niini iya kining gipaabot sa maong dapit ug didto siya dapit sa dalan duol sa usa ka apartment.
Matud pa ni PO3 Jocutan nga samtang nagpaabot ang biktima giduol kini sa usa ka tawo ug sa walay daghang estorya gideretso kini og pusil.
Nahagba dayon si PO2 Leogan human kini maigo sa ulo ug diha-diha gihatud kini nila ni PO3 Joefrey Managase sa Mactan Doctors’ Hospital apan gideklarar kini nga patay na paghiabot didto sa tambalanan.
Pipila ka saksi sa maong pagpamusil mibutyag sa kapolisan nga wala sila makaila sa kriminal kinsa giingong nagsul-ob og jacket ug short pants.
Nagduda ang kapolisan nga ang mipatay ni PO2 Leogan posibleng nagselos kaniya.
Nakuha sa kapolisan ang cell phone ni PO2 Leogan ug susihon ang mga text messages niini alang sa posibleng ikatabang sa pagsulbad sa maong krimen.
Nasayran sa Banat News nga si PO2 Leogan mianhi sa Sugbu kay gipadala kini alang sa usa ka Humanitarian Assistance and Disaster Relief Operation sa mga biktima sa bagyong Yolanda. (BANAT NEWS)