Miyembro sa 4Ps nga apektado sa bagyo gipangita sa DSWD

CEBU, Philippines - Ang Department of Social Welfare and Development sa Central Visayas (DSWD-7) padayon pa sa pagsusi sa tanang mga  benepisyaryo sa Pantawid Pamilyang Pilipino Program (4P's) nga mibalhin sa mga dapit nga wala maapektuhi sa bagyong Yolanda.

Matud pa ni Aileen Lariba, usa sa mga tigpamaba sa DSWD-7  nga iyang giawhag ang tanang benepisyaryo sa pagpakigkita sa ilang coordinator  sa  syudad o sa lungsod  diin  sila  magpuyo karon. Dugang pa ni Lariba nga ang ilang buhatan nanawagan  sa  mga  hingtungdan aron masuta kung angay  ba silang magpadayon sa pagdawat sa mga cash grants nga ihatag sa kagamhanan kanila.

Sumala pa ni Lariba nga kadaghanan sa  apektado  sa bagyo nga  benepisyaryo nawad-an og panimalay ug  kabtangan lakip na ang ilang Pantawid IDs, LBP Cash Cards ug ang ubang dokumento kay naanod sa baha nga dala sa miaging  bagyong Yolanda.

“To make sure of the continuity of beneficiaries’ grants and also ensures continuity of their children’s education and access to health services," matud pa ni Lariba.

Gibutyag ni Lariba nga bisan human pa sa dakong kadaot nga gibilin sa maong bagyo sa ilang kinabuhi ug panginabuhian, ang maong mga benepisyaryo dili angay nga mabiyaan sa maong programa. (BANAT NEWS)