CIDG-7 paimbestigaron bahin sa kamatayon sa negosyante

CEBU, Philippines - Gimandoan sa Regional Director sa Police Regional Office 7 Chief Supt. Danilo Constantino ang Criminal Investigation and Detection Group 7 nga maoy moimbestigar sa kamatayon sa negosyante nga si Jerome Bendebel  niadtong Enero 1. Nakahinabi na ni Constantino ang officer-in charge sa rehabilitation center nga wala niya nganli ug mihatag kini kaniya og ngalan sa polis nga gikatahong mikuha kang Bendebel.

Matud pa ni Constantino nga palapdan pa nila ang imbestigasyon nga ilang himoon tungod kay dunay mga bag-ong kasayoran nga nakuha sa maong OIC.

Sumala pa ni Constantino nga igsuon nga babaye sa biktima ang mi-request sa maong rehabilitation center nga ipasulod si Bendebel apan gi-refer matud pa sa maong rehab center sa usa ka tawo nga makatabang kanila.

Matud pa niya nga ang maong tawo mao ang nagpailang polis nga miadto sa buhatan sa kapolisan sa lungsod sa Balamban. Dugang ni Constantino nga gisakay sa Pajero si Bendebel ug matud pa nga misukol kini ug giguba niini ang bildo sa Pajero nga gisakyan kaniya ug sa tulo ka tawo.

Sumala pa ni Constantino ang maong OIC mibutyag nga wa nila dawata sa rehabilitation center si Bendebel kay wala na man kini panimuot ug bisan giunsa nila pagpukaw wa na gyud kini nimata.

Tungod kay wala dawata sa rehabilitation center gidala si Bendebel sa Perpetual Soccour Hospital apan gideklarar na kini nga patay na pasado alas 3:00 sa maong tambalanan.

Matud ni Constantino tungod sa maong bag-ong mga impormasyon mas maayo nga ang CIDG 7 na maoy moimbestigar sa maong kaso, hinuon gipasalig niya nga kun ugaling ang maong polis nadestino gyud sa PRO7 makapaabot kini og impartial nga  imbestigasyon gikan sa CIDG. (EIM)(BANAT NEWS)