Mga hamtong nga kauban sa batang snatchers nadakpan

CEBU, Philippines - Usa ka lalaki ang nadakpan sa buy bust operation ug duha ang nasikop sa kapolisan nga naghupot og illegal drug paraphernalia sa managlahing dapit sa Sugbo.

Ang nasikop sa buy bust operation naila nga si Edwin Trocio Abanid, 40, molupyo sa sitio Kabangkalan, barangay Daang Lungsod sa dakbayan sa Toledo.

Matud pa nga pasado alas 2:00 sa miaging hapon usa ka team sa kapolisan sa dakbayan sa Toledo mipahigayon og buy bust operation sa barangay Daang Lungsod sa dakbayan sa Toledo.

Ug dihang gibaligyaan ang polis og usa ka pakete nga  shabu sa biktima dali kining gidakop sa kapolisan.

Narekober sa kapolisan ang buy bust money nga P200 ug ang siyam ka pakete nga shabu gikan sa suspetsado.

Mag-atubang og kasong kalapasan sa Section 5 ug 11 sa Article 2 sa RA 9165 ang maong suspetsado.

Samtang nasikop sa mga sakop sa City Intelligence Branch ang duha ka tawo nga midagan kuyog sa mga bata nga napakyas sa paglabni sa shoulder bag sa usa ka langyaw sa alas 11:00 sa gabii sa miaging adlaw sa Mango Square sa Gen. Maxilom Avenue sa dakbayan sa Sugbo .

Naila ang duha nga sila si Roberto Pasanting alyas Dodong, 47, ug si Irish Jane Valero alyas Tata, 30, puros molupyo sa sitio Kalubihan Banawa, barangay Guadalupe sa dakbayan sa Sugbo.

Matud pa nga naaktohan sa mga sakop sa CIB ang usa ka grupo sa mga bata nga misulay unta sa paglabni sa bag sa usa ka langyaw apan napakyas kini.

Dihang nanaog sa sakyanan ang mga sakop sa CIB naglumbaanay og dagan ang mga menor lakip na sila si Pasanting ug ni Valero.

Daling gisikop ang duha sa kapolisan ug nasuta nga si Pasanting may dala nga 12 ka linikit nga marijuana ug tulo ka pakete nga shabu samtang si Velero nakuhaan sab og upat ka pakete nga shabu sa kapolisan.

Kasamtangang natanggong karon ang duha sa karsel sa Cebu City Police Office samtang giandam pa ang kasong kalapasan sa Section 11 sa Article 2 sa Republic Act 9165.  (BANAT NEWS)