Gagmay’ng mananagat may bahin sa P33 milyones

CEBU, Philippines - Giklaro ni Gob. Hilario Davide III nga lakip sa makapahimulos sa P33 milyones nga ihatag sa Bureau of Fisheries and Aquatic Resources sa lalawigan sa Sugbo ang gagmay’ng mga mananagat.

Ang kasabutan nga gilagdaan tali nilang Davide ug BFAR Director Asis Perez nagmando nga ang pundo gamiton sa pagpaayo sa nagusbat sa bagyo nga mga tinanum nga guso sa kadagatan.

“Di man na limited lang sa seaweeds, I spoke with the director,” matud pang Davide.

Walay lapad nga umahan sa guso sa Sugbo apan si Davide nagtuo nga adunay pipila nga maoy gikuhaan sa suplay sa Shemberg nga adunay planta sa Sugbo.

Matud pa ni Davide nga ang gagmay’ng mga mananagat  lakip sa makapahimulos sa pundo sa BFAR sanglit magamit kini sa pagpangapud-apod og bangka ug payaw aron mahibalik ang ilang panginabuhi.

Ang paghatag sa BFAR sa maong pundo alang sa Seaweed and Aquafarm Rehabilitation and Development Program isip pagtabang sa mga lokal nga kagamhanan nga mapabalik ang panginabuhi sa kadagatan ug sa mga mananagat.

Ang kagamhanan sa lalawigan sa Sugbo mohatag og tampo balor og 20 porsiyento alang sa pagpatuman sa maong programa.

Gawas sa pagtugot kang Davide nga mopirma sa kasabutan, ang hunta probinsiyal sa Sugbo nipadayag usab sa suporta sa programa sa BFAR nga gitawag og, "Ahon!  Sampung Libong Bangka para sa Dalawampung Libong Pamilya."

Gani sa resolusyon nga gipangamahan ni Bokal Thadeo Ouano, giawhag sa hunta probinsiyal ang mga negosyante sa Sugbo nga suportahan ang maong programa aron matabangan ang mga mananagat nga naapektohan sa bagyo.  (BANAT NEWS)