CEBU, Philippines - Gibana-bana nga mokabat sa P600 mil ang nakuha sa duha ka lalaki nga mikawat sa sing-sing ug kwentas sa imahen ni Sta. Rita sulod sa kapilya niini sa Tabor Hills sa Talamban sa alas 8:45 sa miaging gabii.
Ang hepe sa Talamban Police Station nga si Senior Insp. Jose Gesto nga nahinabi sa Banat News miingon duha ka bulawan nga kwentas ug duha ka bulawan nga sing-sing ang nakuha sa duha ka kawatan.
Matud pa nga gikuha kini sa duha gikan sa imahen tungod kay gisul-ob man kini sa imahen ni Sta. Rita. Duna nay duha ka tawo nga gidudahan sila si Gesto.
Giingong walay timailhan nga may force entry sa kapilya tungod kay nataligam-an lang gyud kini pagsirado tungod sa Christmas party sa mga seminarista ug kaparian sa miaging gabii, mao nga nakasulod ang duha ka mga gidudahang kawatan.
Dihang misulod ang usa ka seminarista sa kapilya diha na nabantayan nga nawala na ang sing-sing ug kwentas sa maong imahen.
Matud pa ni Gesto nga posibleng didto gyud mismo miagi sa pultahan ang maong mga kawatan. Sumala ni Gesto nga ang duha ka gidudahan nilang tawo bag-ohay lang nakagawas sa Cebu City Jail. (/EIM)(BANAT NEWS)