Anak ni JVR wa atimana sa MDH

CEBU, Philippines - Si Talisay City Administrator John Yre De los Reyes nagpadayag sa iyang kasagmuyo sa Mandaue District Hospital tungod kay ang iyang manghod ug ang uyab niini nga midangop didto tungod kay nangapaso giingong wala atimana sa maong tambalanan.

Si Yre nga nahinabi sa Banat News kagahapon nagkanayon nga ang iyang manghod nga si John Venth, 21, ug ang uyab niining si Salve Vega nangapaso dihang ang 1000 cc engine nga motorsiklong ilang gisakyan  mibuto ang hose sa radiator tank ug nangapiksan sila sa init kaayong tubig niini. Matud ni Yre nga ang duha ka bitiis sa iyang manghod nangapaso ug ang tuong bitiis niini ang nakaangkon og 2nd degree burn.

Samtang si Vega nakaangkon usab og paso sa kalawasan hinuon dili grabe.

Ang maong insidente nahitabo mga alas 10:00 sa gabii diha sa may barangay Subangdaku, dakbayan sa Mandaue. Si John Venth ug Vega gidala ngadto sa Mandaue District Hospital apan matud ni Yre nga wala hatagi ang duha og initial treatment sa ilang mga paso tungod kay wala kini police report. Matud ni Yre nga wala magpa-blotter ang iyang manghod sa hitabo tungod kay wala man kini nakabangga o naka- engkwentrong sakyanan.

Si Yre miapas ngadto sa iyang manghod sa Mandaue District Hospital.

Gibutyag ni Yre nga usa sa medical staff sa tambalanan ang mibalibad sa pag-atiman sa mga biktima tungod kay giingong nagkinahanglan pa silang mosumitir og report gikan sa medico legal sa tambalanan aron sila maatiman.

Apan usa ka oras ang nakalabay matud ni Yre nga usa ka nurse sa hospital ang misulti kaniya nga dili nila mahatagan og initial treatment ang mga biktima tungod kay nahutdan sila og burn ointment.

Si John Venth ug Salve gidala ngadto sa Dr. Ignacio Cortes General Hospital sa barangay Centro diin sila nahatagan og initial treatment dayon gibalhin sila ngadto sa Chong Hua Hospital sa dakbayan sa Sugbo.

Hinuon si Yre nagkanayon nga wala sila’y planong mopasaka og reklamo batok sa tambalanan apan igo lang siyang mipadayag sa iyang kasagmuyo tungod sa matang sa serbisyo nga anaa ang maong tambalanan.

“Dili lang mi moduso og reklamo ang ako lang basin nabuhat ni nila ngadto sa ubang pasyente unya luoy kaayo, unta isipon nilang igsuon ang mga pasyenteng nanginahanglan og tabang aron dili sila magpanuko og atiman,” ni Yre pa.

Si Mandaue City Administrator, Atty. James Abadia nga nahinabi sa Banat News kagahapon nagkanayon nga nag-estorya siya ug ang hepe sa tambalanan. Matud ni Abadia nga giingong ang tambalanan niadtong higayona puno kaayo sa mga pasyente nga ang kaso “life threatening” ug ang kaso ni John Venth ug Vega dili “life threatening” hinungdan gi-refer sila ngadto sa laing tambalanan.

Apan matud ni Abadia nga magpahigayon sila og imbestigasyon sa maong insidente ug ipatawag nila ang duha ka habig aron masuta kung unsa gyud ang nahitabo.

Dugang ni Abadia nga kung ugaling dunay nahimong kalapasan ang mga nagdumala sa tambalanan mapahamtangan sila og tukmang silot.

Ug kung ang pamaagi sa tambalanan ang dunay problema pangitaan nila kini og paagi nga makurihian. (/EIM)(BANAT NEWS)