Biktima sa pabuto 3

 CEBU, Philippines - Tulo ang biktima sa pabuto nga gidala sa Mandaue City Hospital sa pagsugat  sa Pasko taliwala sa higpit nga pahimangno nga gihimo sa kagamhanan sa maong dakbayan.

Si Dr. Egenio Abuda sa Mandaue City Hospital nga nahinabi sa Banat News miingon nga naglakip sa tulo nga biktima sa pabuto sa dakbayan mao ang 21 anyos, 14 ug ang 10 anyos nga bata nga nakasinati og kadaut sa ilang mga tudlo.

Dugang pa ni Dr. Abuda nga wala sila makadawat og biktima sa saag nga bala atol sa pagsugat  sa Pasko gumikan  tingale  sa  higpit nga pahimangno sa kapolisan batok  sa magpabuto  og  armas. Si Senior Superintendent Petroneli Baldebrin, director sa  Mandaue City Police Office  (MCPO) higpit  nga nagpahimangno sa kapolisan, security guard ug sa tanang license gun holder sa dakbayan nga likayan ang pagpabuto sa armas sa pagsugat sa Pasko.

Ang maong pahimangno iyang gihimo aron  kalikayan  ang   mabiktima sa saag nga bala atol sa pagsugat sa tungang gabii sa Pasko sa kabarangayan sa maong dakbayan.

Si Fire Chief Inspector  Ronaldo Orbeta nga maoy fire marshall sa maong dakbayan  higpit  nga nagdili sa pagpamaligya og pabuto sa dakbayan karong tuiga.

Wala  sila mohatag og  permit sa mga magpapatigayon nga nagtinguha sa pagbaligya og  pabuto.

Si Dr. Reynan Cimafranca  nga maoy Regional Epidemeology Surviellance Unit  (RESU) chief sa Department of Health (DOH) 7  miingon nga sagad sa biktima sa miaging  Pasko igo  lang  napiksan  ug  dili  gyud  maoy nagpabuto.

Nunot niini si Cimafranca miingon nga ang pipila sa mga  biktima  igo  lang  nga  mipunit sa mikagar nga  pabuto ug ang  uban  nabuthan tungod  sa panguryoso  busa  napiksan sa pagbuto niini. Gitataw ni Cimafranca nga naglakip sa mga pabuto nga gidili  mao ang Judas belt, whistle bomb, piculo, triangle ug kuwetes kay mosarap man kini kun dili maayong pagkahimutang atol sa pagduslit.  (BANAT NEWS)