Tulisan natangtanga’g taptap sa nawong sikop

CEBU, Philippines - Nasikop sa kapolisan ang usa ka lalaki nga napakyas sa pagtulis sa usa ka magtiayon kay midagan kini human matang-tang ang tap-tap sa iyang nawong didto sa sitio Cogon sa barangay Basdiot sa lungsod sa Moalboal sa miaging  gabii.

Ang nasikop naila nga si Andres Delicano, 32, molupyo sa sitio Tongo, barangay Basdiot sa lungsod sa Moalboal.

Samtang ang biktima naila mao ang magtiayon nga sila si Anastacia Taladro, 52 ug si Lucino Taladro, 52, molupyo sa sitio Cogon sa barangay Basdiot sa maong lungsod.

Base sa spot report sa Cebu Provincial Police Office nga  pasado alas 8:00 sa miaging gabii nakaamgo  ang  magtiayon  nga  may  tawo  sa ilang  palibot kay  nagpunay og  paghot ang ilang iro.

Busa nakahukom si Lucino  nga mogawas sa ilang  balay  aron masusi  ang gipaghot  sa ilang  iro. Apan  sa  pag-abli  niya  sa sira  sa ilang pultahan daling gikuptan ang  iyang  liog  sa suspetsado  uban  sa gition  nga kutsilyo niini.

Dayon  gihanaan  siya  og  dunggab  sa tiyan, apan  miingon  kuno  kini  nga “kuwarta  ray  ako”.

Busa gilayog sa biktima ang suspetado ug sa ilang paglinayogay natangtang ang taptap sa nawong sa suspek  ug naklaro  ang iyang  dagway, busa misutoy  kini  og  dagan  pahilayo  sa maong  lugar subay  sa sementadong  koral  sa biktima.

Dihadiha gisumbong  dayon  sa biktima  ngadto  sa kapolisan ang  maong  hitabo.

Sa hot  pursuit  operation  sa  kapolisan  nga gilusad, misangpot sa  pagkasikop  sa   suspetsado  ug  nabalhug dayon  sa prisohan.

Giandam  dayon  sa  mga  biktima  ang  kaso  nga  ilang  ipasaka  batok  sa suspetsado. (BANAT NEWS)