Kusinero sa barko giurom patay
CEBU, Philippines - Patay na nga napalgan sa sulod sa cabin sa barko ang usa ka kusinero kinsa gidudahang giurom samtang natulog didto sa barangay Looc, dakbayan sa Lapu-Lapu kagahapon sa alas 9:00 sa buntag.
Ang namatay mao si Marcelino Oligario Nepomoceno, 57, minyo nga lumad nga taga dakbayan sa Cavite ug kusinero sa MV Meeling. Ang maong barko gibaradero sa dakbayan sa Lapu-Lapu hinungdan sa pagkapundo niini sa maong dapit.
Si PO2 Jude Querobin sa homicide section sa kapolisan sa maong dakbayan miingon nga natingala ang mga kauban niining crew sa maong barko kagahapon sa buntag kay walay ininit nga tubig nga ilang magamit.
Matag buntag naanad na sila sa ininit nga tubig nga iandam kanunay ni Nepomoceno.
Matud pa ni PO2 Querobin nga sukwahi sa naandan nga trabaho ni Nepomoceno, isip kusinero alas 4:00 pa sa kaadlawon mamatikdan sa mga tripulante nga magsugod na kini sa pagpangluto sa ilang kusina.
Gumikan niini naanad na sila nga matag buntag may ininit na nga tubig nga ilang ikapangape.
Dugang pa ni PO2 Querobin nga gumikan kay way ininit nga tubig usa sa ilang mga crew miadto sa cabin nga gikatulgan ni Nepomoceno aron kini pukawon.
Apan bisan giunsa og tuktok, wa gyud mangabli sa cabin, busa gipugos kini sa mga kauban nga crew sa pagguba ang lock sa cabin.
Apan nakurat na lang ang tanan dihang nakita nila nga wala nay panimuot ang kusinero.
Si PO2 Querobin nagkanayon nga nanawag dayon ang mga kauban ni Nepomoceno og Emergency Rescue Unit Foundation (ERUF) ug gihatud kini ngadto sa Lapu-Lapu City Hospital apan gideklarar kini sa mga doktor nga dead on arrival.
Gitataw ni PO2 Querobin nga sa ilang pagtan-aw sa lawas sa namatay wala sila’y nakita nga mga timailhan nga adunay foul play ang kamatayon ni Nepomoceno apan sa gihapon ilang gisugyot ngadto sa mga tagtungod nga angay nga ipa-autopsy ang patay’ng lawas niini sa pagsuta sa hinungdan siyang kamatayon. (BANAT NEWS)
- Latest
- Trending
