32 sitio sa Sugbu delikadong puy-an

CEBU, Philippines - Gimando sa Department of Environment and Natural Resources-7 pabakwiton ang mga residente sa 16 ka mga sitio dinhi sa Cebu nga highly susceptible sa gitawag nga "storm surge."

Ang storm surge, sa nahinumduman nga maoy hinungdan nganong daghang kinabuhi nga nakalas sa Tacloban City sa dihang nikuso-kuso ang super typhoon "Yolanda."

 "Dapat gyud nga mo evacuate ang mga residents sa mga areas nga prone sa storm surge," matud pa ni Eddie Llamedo, ang information officer sa DENR-7 atol sa press briefing nga gipahigayon sa Philippine Information Agency-7 kagahapong adlawa.

Ang 16 ka mga sitio nga highly susceptible sa storm surge: Sitio Cotcoton, barangay Arpili sa Balamban; Sitio St. Jude, barangay Tungkil, Minglanilla; Sitio Rattan, barangay Tangke, Talisay City; Sitio Pantalan, Kota, Proper Talisay, Talong, Camote, Okra ug Ampalaya, barangay Talisay, Sta. Fe; Sitio Katamban, barangay Langub; Sitio Gumamela, San Francisco, Sitio Euphorbia, barangay Kinatarcan, Sta. Fe.

Apil usab ang Sitio Batong ug Kagwangan, barangay Tarong, Madridejos; Sitio Baybay, barangay Kodia, Madridejos; Sitio Pooc ug Sta. Barbara, barangay Sillion, Bantayan ; Sitio Mars, Saturn, Uranus ug Guinglakgan, barangay Patao, Bantayan.

Samtang gi-identify usab sa DENR-7 ang laing 16 ka mga sitio sa Sugbo  nga "moderate" lang ang peligro gikan sa storm surge.

Ang maong mga lugar: Sitio Lower ug Upper Riverside Segra, barangay Arpili, Balamban; Sitio Nazareth ug KSKC, barangay Tungkop, Minglanilla; Sitio Bagacay ug Villa San Pedro, barangay Tulay, Minglanilla; ug Sitio Magay, barangay Tangke, Talisay City.

Apil usab niini ang Sitio Sta. Rosa, San Roque, barangay Pooc, Sta. Fe; Sitio Dolphin, barangay Langub, Sta. Fe; Sitio Caltex, Malabon ug Pabrika, barangay Talangnan, Madridejos; Sitio Tabagak ug Katipunan, barangay Tabagak, Madridejos; Sitio Riverside ug Florencio, barangay Malbago, Madridejos; ug Sitio Proper Maalat, barangay Maalat, Madridejos.

Gawas sa maong mga sitio sa Cebu, duna say 14 ka mga sitio sa Negros Oriental ang nabutang sa "high risk” sa storm surge.

"Storm surge occurs when seawaters are being carried or lifted by very strong winds. It usually happens when seabeds are shallow and longest beachfront," matud pa ni Llamedo.

Dugang pa ni Llamedo nga makatabang og dako pagsanta sa storm surge ang mangrove forest nga itanom sa kabaybayunan.

Ang DENR migahin karon og balor 7.2 milyones ka pesos alang sa pagpananom og mangrove o bakhaw sa kabaybayonan.

Ikaduhang solusyon mao ang pag-implementar sa "no build zone" 50- metros gikan sa baybayon ug lapyahan ug kadtong mga panimalay nga anaa sa danger zone kinahanglan papahawaon.

Samtang ang ikatulong buhaton mao ang daling pagbakwit sa dili pa ang pagtugpa sa bagyo. (BANAT NEWS)