The Freeman/ Banat News reporters gipasidunggan tungod sa pag-abag kontra Human Trafficking

CEBU, Philippines - Pipila ka mga sakop sa media dinhi sa Sugbo ang gipasidunggan kagahapon sa International Justice Mission (IJM) kay gihulagway nila nga nakahimo kini og pag-abag sa kampanya batok sa pag-negosyo og tawo o Human Trafficking.

Ang tibuok kalibutan nagsaulog kagahapon sa International Anti-Human Trafficking Day ug dinhi sa Sugbo adunay yano nga kalihukan ug apil niini ang paghatag og pasidungog sa mga reporters.

Ang mga nahukmang mananaug sa 2013 Justice Award for Reporting on Human Trafficking naglakip sa duha ka reporters sa The Freeman/Banat News – Kristine Quintas ug kining tagsulat.

Ang indigay sa pagsuwat og balita kabahin sa Anti-Human Trafficking gibahin sa lainlaing kategoriya sa Print, TV ug Radio.

Si Quintas nga reporter pa kaniadto sa DYLA maoy nakakuha sa first prize sa Radio Category ug ikaduha kaniya si Astra Logarta sa sibyaanan DYHP.

Sa TV Category si Allan Domingo maoy midaug sa Hard News, samtang si King Anthony Perez sa TV News Feature.

Sa Print Category Hard News si Ador Vincent Mayol sa Cebu Daily News ang nakakuha sa 1st prize, Kevin Lagunda sa Sunstar ang 2nd prize ug Jerome Dalipe sa Sunstar ang 3rd prize.

Si Ador Vincent Mayol mao gihapon ang midaug sa first prize sa Print Feature category, 2nd prize si Jose Santino Bonachita sa Cebu Daily News ug Rene U. Borromeo sa The Freeman ang 3rd prize.

Si Assistant Cebu City Prosecutor Ma. Luisa Ratilla miawhag sa ubang sakop sa media nga aktibo g’yud nga motutok sa isyu sa Human Trafficking aron nga ang mga tawo nga nalambigit niini magpanagana na pagpadayon sa ilang kalihukan. Giawhag usab ni Ratilla ang mga ginikanan nga migamit sa ilang mga anak aron lang makakwarta nga likayan ang maong binuang.

Adunay mga ginikanan nga nasakpan nga mipahimulos sa ilang mga anak nga pugson pagpahubo ug ipaatubang sa camera aron makita ang ilang lawas sa mga langyaw. (BANAT NEWS)