Titulo sa yuta nadawat na sa taga Mandaue
CEBU, Philippines - Gipang-apod-apod na niadtong miaging adlaw ang titulo sa 9.2 ka ektaryang yuta ngadto sa kapin nga 1,000 ka molupyo sa dakbayan sa Mandaue.
Gidawat ang maong mga titulo sa mga molupyo sa Subangdaku, Guizo, Tipolo ug Mantuyong.
Si Philippine Commission on Urban Poor (PCUP) 7 Regional Director Chloe Osano maoy usa sa mitambong sa pag-apud-apod sa mga titulo atol sa Urban Poor Solidarity Week celebration.
Ang maong kalihokan gitambongan usab ni Mayor Jonas Cortes uban sa mga opisyal sa kagamhanan sa dakbayan.
Kasagaran sa mga nakadawat sa maong mga titulo sa tag-42 metro kuwadrado nga gidak-on sa yuta, mga sakop sa Federation of Mandaue Community Urban Poor Inc. (Fedmacupi).
Si Roger Paller nga maoy public information officer sa kagamhanan sa maong dakbayan nga nahinabi sa Banat News miingon nga una itunol ngadto sa mga benepisyaryo sa titulo, higpit sila nga gi-screen sa mga tinugyanan sa kagamhanan. (BANAT NEWS)
- Latest
