Market denial sa pabuto giawhag

CEBU, Philippines - Giawhag  sa kapolisan  ang  mga  Sugboanon  nga  likayan  ang  pagpamalit og  pabuto  o  firecrackers  ning  nagsingabot  nga  Pasko  ug  Bag-ong  Tuig.

Matud  pa  ni PSupt. Renato  R. Dugan,  Public Information Officer (PIO)  sa Police  Regional  Office (PRO)7  nga  kun subayon  sa katawhan  ang  gitawag  nga  “market denial” o  di  mopalit  sa pabuto, wala  na usa’y  mamaligya  niini.

“Kun wa nay  mamalit  og  pabuto, wa  na   sa’y  mamaligya”  sumala  ni  Dugan  dihang  gipangutana  kun  unsay  mahimo  sa kapolisan  aron masanta  kining  pagpamaligya  og  pabuto.

Gani  giawhag  ni  Dugan  nga  mas  labing  maayo  mogamit  na lang ang  mga  tawo  og  torotot, lata, kaldero,  planggana,  plato    nga  bunalan  og  puthaw  o  kahoy  aron  lang  mopaka  sa panahon  sa Pasko. Ang  pabuto  daghan  na  kaayong  nangamatay  ug  gawas  nga  mamatay  mag-antus  sa tibuok kinabuhi  nga  pagka-inutil   ang  usa  ka  tawo  nga  masugamak  sa pabuto.

Kini  tungod  kay  may  mapungkol, mabulhog  ug  may  uban  pang  matang  sa pagkainutil  gumikan  sa pabuto.

Matud  pa  ni  Dugan  nga  ang  mga tawo  ray  gahi  og  ulo  tungod  kay  bisan  kun  unsaon  sa kapolisan  sa pagpahibawo  kalabot  sa  peligrong  ibunga  niining  paggamit  og  pabuto,  daghan  lang  gihapong  mosagop  niini.

Midugang  si Dugan  nga  ang  pabuto  sama  ra  sa  illegal   drugs  nga kun  way  mamalit,  wa  usa’y  mamaligya  niini.

Busa  matud  pa  ni  Dugan  nga  alang  kaniya  mas  maayong  ipatuman  ang  market  denial  sa pabuto aron  nga  mag-anam  kawagtang  kining  maong  negosyo  dinhi  sa Sugbo. Ang  mga  pabrika  og  pabuto makita    sa dakbayan  sa Lapulapu. (BANAT NEWS)