Naga City mag-Christmas party bisan sa katalagman

CEBU, Philippines - Bisan og ang ubang mga lokal nga kagamhanan mikanselar sa ilang mga Christmas party, ang dakbayan sa Naga mopahigayon gihapon niini. Kahinumduman nga ang dakbayan sa Lapu-Lapu ug Mandaue mikanselar sa ilang Christmas party diin ang budget niini ilahang gidonar ngadto sa mga nabiktima sa bagyong Yolanda.

Si Mayor Valdemar Chiong sa Naga nagkanayon nga magpahigayon sila og simple lang nga Christmas party alang sa mga kawani sa siyudad. Matud ni Chiong nga walay rason nga ikanselar nila ang pagpahigayon og Christmas party ug buot niya nga ang mga kawani sa siyudad malingaw usab kini sa maong tinuig nga okasyon ubos sa simple lang nga selebrasyon.

“Walay rason nga among i-cancel among Christmas party para sa mga empleyado. Dili man sab siguro ngil-ad kay we extended our hand to other LGUs affected by natural calamities even those outside Cebu,” ni Chiong pa.

Kahinumduman nga ang dakbayan sa Naga mipagawas kini og P1.2 milyones gikan sa ilang calamity fund diin gigamit nila kini og pamalit og mga relief goods sama sa bugas, noodles, sardinas ug bottled water nga maoy ilang gipanghatag ngadto sa amihanang bahin sa probinsiya sa Sugbo nga grabeng naapektohan sa bagyong Yolanda.  (BANAT NEWS)