Nangangkong paryente ni Mayor Cortes nadakpan sa buybust operation sa MCPO

CEBU, Philippines - Nasikop sa buy bust operation sa kapolisan ang usa ka lalaki nga nangangkong paryente ni Mayor Jonas Cortes  tungod sa pagpamaligya og shabu  diha sa sitio Mabugat sa barangay Tabok, dakbayan sa Mandaue alas 6 pasado ang takna sayo sa miaging gabii.

Ang nadakpan mao si Leo Cortes,  40,  taga Zone Okra sa barangay Paknaan sa maong dakbayan kinsa nasakmitan og  tulo ka pakete nga gidudahang shabu ug lima ka tin foil ug uban pa nga mga kahimanan alang sa paggamit niini.

Si  SPO4 Gregorio Cabesares sa kapolisan sa Presinto 3 sa Mandaue City Police Office (MCPO) nga nahinabi sa Banat News,  miingon nga  dunay nakasumbong kanila bahin sa illegal nga kalihokan sa suspek. Si Senior Inspector Genilo Veraque nga ilang hepe sa nahisgotang presinto mimando gilayon sa paghimo og operasyon batok kang Cortes nga miresulta sa pagkasikop niini human sa buybust operation.

Matud pa nga napalitan sa police decoy ang suspek og balor P300 nga shabu hinungdan sa pagdakop kaniya. (BANAT NEWS)