Taga Bohol gitakboya’g lainlaing sakit

CEBU, Philippines - Human sa 7.2 magnitude nga linog nga mitay-og sa probinsya sa Bohol nga miresulta sa pagkalusno sa daghang mga balay sa maong dapit, ang mga opisyales sa natad sa panglawas nagpahigayon og medikal nga konsultasyon gawas sa pag-atiman sa mga nanga-angol.

Matud pa sa Philippine Information Agency (PIA) Cebu nga ang nag-unang mga kaso sa sakit atol sa konsultasyon  mao ang acute respiratory infections sama sa pneumonia ug sip-on. Si Health Secretary Enrique Ona  nagkanayon nga ang mga bakwit nga miistar sa mga temporaryong hospital  namalhin  human sa bagyong Yolanda.     Dugang pa ni Ona nga ang uban pang komun nga mga sakit nga mitakboy sa mga bakwit mao ang high blood pressure, hilanat ug pagkapiang.

Gitaho ni Ona nga kinatibuk-ang 29, 283 ka mga pasyente ang giduaw sa sunod-sunod  nga tay-og ug sa katibuk-an adunay 10, 170 ka mga outpatients , samtang adunay 3,081 usab ang midawat og mental health ug psycho-social nga suporta agi’g resulta sa kakuyaw  nila sa linog.

Gipadayag ni Ona nga ang ubang 14 ka mga hospital sa probinsya sa Bohol nagusbat sa miaging linog. 

Gitug-an usab ni Ona nga aduna gayu’y pagkakuwang sa mga suplay sa medisina sa maong probinsya. (BANAT NEWS)