SK chairman kuhaong consultant ni Rama

CEBU, Philippines - Si Konsehal John Philip Po nga maoy presidente karon sa Sanguniang Kabataan Federation (SKF) dinhi sa dakbayan kuhaon nga consultant ni Mayor Michael Rama.

Ang termino ni Po isip ex-officio member sa Cebu City Council kutob na lang ugma Nobiyembre 30 mao nga nahukman sa mayor nga kuhaon niya ang serbisyo ni Po aron moabag sa Cebu City Youth Development Council.

Ang kagamhanan wala pa mohukom kun kanus-a ibalik ang pagbutang og representante sa kabatan-onan diha sa mga legislative councils sa barangay, lungsod ug dakbayan, apil na gani sa Sanguniang Panlalawigan.

Daghan ang miingon nga angay na g’yud nga wagtangon ang mga youth representatives diha sa mga legislative bodies kay wala sila’y nahimong kaayuhan sulod sa nanglabay’ng katuigan.          

Bisan si Po nga nakalingkud og tulo ka tuig diha sa konseho nabantayan nga panagsa ra mosalmot sa pagtuki sa mga isyu nga gihisgutan sa mga konsehal. Nabantayan nga ang gitahas nga katungdanan sa mga SK representative sa konseho mao ang pagsuta kun ang mga isyu nga gibutang sa agenda nakakompleto ba sa mga gikinahanglang dokumento.

Apan matud sa usa ka konsehal nga bisan og kini maoy tahas ngadto sa SK official apan wala siya did-i sa pagsalmot pagtuki sa mga isyu aron madungog usab unta ang huna-huna ug baruganan sa mga batan-on.  (BANAT NEWS)