CNU magpatabang sa siyudad alang sa pag-repair sa ilang buildings

CEBU, Philippines - Ang kadagkoan sa Cebu Normal University (CNU) nangayo karon og tabang sa kagamhanan sa dakbayan sa Sugbo nga kantidad og P19.7 Milyones aron ipaayo sa nangaguba nila nga building. Ang suwat ni Marcelo Lopez, presidente sa Cebu Normal University, gipadala ngadto ni Vice Mayor Edgardo Labella ug gidiskutir kini sa Cebu City Council.

Ang mga konsehal sa dakbayan mitugyan sa maong isyu ngadto sa opisina ni Mayor Michael Rama aron kahatagan og pagtagad. Walay kasiguroan nga ang gipangayo nga kantidad sa presidente sa CNU kahatagan og katumanan.

Matud ni Lopez nga ang pipila nila ka school buildings diha sa Osmeña Boulevard nakasinati gayud og kadaut dihang ang Sugbo ug Bohol gitay-og sa kusog kaayo nga linog kaniadtong Oktubre 15.

Dunay ubang mga konsehal nga miingon nga ang CNU usa ka state university ug ang nasudnong kagamhanan maoy angayan nga mogahin og kantidad sa pagpaayo sa maong building. Apan pipila ka mga konsehal miingon nga paabuton nila kun unsa ang rekomendasyon ni Mayor Rama. (BANAT NEWS)