TCPS nangandam sa away ni Pacman

CEBU, Philippines - Bisan og wala’y gikatahong mga insidente sa mga milabay’ng away ni Kong. Manny Pacquiao ang kapolisan sa dakbayan sa Talisay magpabiling alerto karong Domingo atol sa away niini batok ni Mexican-American Brandon Rios. Si Supt. Resty Santos, officer-in-charge sa Talisay City Police Station nga nahinabi sa mga tigbalita nagkanayon nga sa iyang nahinumduman sa mga milabay’ng away ni Pacman wala’y mga kagubot nga nahitabo gawas lang sa mga atakehon sa gihambin nga sakit.

Matud niya nga matag away ni Pacman ang kadalanan mingaw kaayo diyotay lang ang mga sakyanan kay ang mga tawo magtapok og tan-aw sa duwa ni Pacman.

Apan bisan pa niini si Santos nagkanayon nga ang kapolisan dili mokompiyansa ug atol sa away ni Pacman karong Domingo magpabilin silang alerto tungod kay posibleng dunay magpahimulos sa panahon.

Matud usab ni Santos nga higpit gihapon ang ilang pagpatrolya diha sa kadalanan sa siyudad maong dili nila tugotan nga makatan-aw sa pay-per-view screening tungod kay magbantay man sila sa palibot.

Sa laing bahin, aron pagmentenar sa kahusay ug kalinaw si Santos nanawagan sa publiko nga magmabinantayon ug kung dunay mga madudahang lihok o ba kaha dili nila sinati nga mga tawo nga ilang makita i-report gyud dayon nila kini ngadto sa polis.

Gipasabot ni Santos nga dunay mga priso gikan sa Tacloban ang mipuga human sa bagyong Yolanda ug uban niini mianhi sa Sugbo. (BANAT NEWS)