Kapin sa 1,000 ka tinun-an miboluntaryo pagpamutos

CEBU, Philippines - Mikapin sa usa ka libo nga tinun-an ug magtutudlo sa kolehiyo ug high  school ang nagsugwak sa Phil. Air Force Gym sa Mactan Benito Ebuen Air Base o MBEAB alang  sa  pagpamutos sa mga relief goods gikan sa gawas sa nasud nga  miabot sa maong base militar.
Mapasalamaton  kaayo  si Clarence Enoferio ang Duty Head sa DSWD nga nadestino sa PAF Base gym  tungod  sa boluntaryong  abag   sa mga tinun-an sa nagkadaiyang kolehiyo ug high school  sa  pagpamutos  sa  mga  relief goods. Himoon  nila  ang  maong  pagpamutos  sulod  sa   24 oras   hangtud  nga  mahurot  na ang  tanang  mga  butang  nga  gikan sa gawas   nga  mga  nasud.
Ang  maong  mga  hinabang  gikan  sa  Taiwan, Korea, United Arab Emirates, Dubai, Thailand ug  Singapore. Gawas  sa  mga  hinabang  nga  makaon,  may  mga  tambal  usab  silang  nadawat  nga  mga  masakiton  nga  biktima  sa bagyong  Yolanda.
Matud pa ni Dr. Fevelina Baluyot ang OIC Director sa Phil. State College of Aeronautics o PhilsCA sa MBEAB   giawhag  dayon  niya ang  mga  magtutudlo  ug    mga tinun-an   nga  moabag  sa  mga  buluhaton  sa pagpamutos   human sila makadawat sa hangyo sa mga opisyal sa Phil. Air Force.
Lakip  nga  mihangyo  kanila  mao   si Junard Ahong Chan ang bag-ong napiling kapitan sa Brgy. Pajo aron  dali  ra  nga  mahuman  ang  pagpamutos ug  ikahatag  usab  dayon  ang  maong  mga  hinabang ngadto  sa mga  hingtungdang  modawat  niini.
Gibanabana  nga  may  500 kapin ka mga tinun-an sa PhilsCA ang mitabang sa pagpamutos ug paghakot sa mga relief goods alang sa mga biktima sa bagyong Yolanda sa  Tacloban  ug  sa  probinsiya sa Leyte .
Samtang  mikapin usab sa 500 ka mga tinun-an sa Cebu Doctors University CDU, Velez College, Liloan Boys Home, Don Bosco, St. Alfonsos Catholic Schools o SACS sa dakbayan sa Lapulapu ug ang tinun-an sa Pajo National High School  nga  miabag sa pagpamutos sa mga relief goods sulod sa PAF base.
Ang mga tinun-an nagkahiusa sa ilang tumong sa boluntaryo   nga pagpamutos   tungod  kay mao   lamang  kini   ang bugtong paagi nga makatabang sila sa mga biktima sa kalamidad. Kadaghanan  kanila  may  mga  paryente  nga  nabiktima  sa maong  katalagman  didto  sa   Leyte.
Hinuon gipakaon sa mga sakop sa Phil. Air Force ang mga tinun-ang   miboluntaryo  sa  pagpamutos  sa  mga  relief  goods. Nagtuo si Enoferio nga daghan pang mga donasyon   gikan sa gawas sa nasud ang ipaagi sa MBEAB gumikan sa kahuot sa tugpahanan sa dakbayan sa Tacloban.(/WC)(BANAT NEWS)