Kalungsoran sa Northern Cebu way klase

CEBU, Philippines - Magpabilin pa gihapon nga walay klase karong adlawa, Lunes ang mga dapit sa amihanang bahin sa lalawigan sa Sugbo ug sa Nobyimbre 15 pa ang gikatakdang pagbalik sa klase niini.

Pagpadala og hinabang sa Kapitolyo sa Northern Cebu gipamolitika?

Usa ka taga Medellin nga atoa na sa Hawaii nanimuyo ang nipaabot kang Presidente Benigno Aquino III sa reklamo ni Mayor Ricardo Ramirez labot sa giingong pagpasagad sa mga opisyal sa Kapitolyo sa mga biktima sa bagyo sa ilang lungsod.

Usa ka Maria Vima Pasaylo Snyder ang nipaambit sa kopya sa iyang suwat pinaagi sa Facebook diin siya nanawagan sa iyang katagilungsod nga mosabwag niini aron madungog sa Malakanyang.

Si Ramirez sa sayo pa mipadayag sa iyang kahibulong nga naabot na ang Kapitolyo sa paghatud sa hinabang sa lungsod sa Daanbantayan samtang gilabyan lang ang Medellin.

Niadtong Sabado sa hapon, si Bise-Gob. Agnes Magpale nihapit sa Medellin gikan sa Daanbantayan diin ang mayor iyang kaalyado ug ni Gob. Hilario Davide sa Liberal Party.

Si Ramirez lang ang bugtong mayor nga sakop sa One Cebu samtang gilibotan siya sa mga lungsod sa Daanbantayan ug San Remigio ug dakbayan sa Sugbo nga ang mga mayor kaalyado sa LP.

“Ug may kalamidad mahitabo maapil ba diay gihapon ang politika?” matud ni Ramirez.

Matud pa ni Snyder nga dili makiangayon ang gihimo sa mga opisyal sa Kapitolyo sanglit nagkinahanglan og tabang ang mga biktima sa bagyo sa Medellin.

Nunot niini nanawagan si Snyder kang Aquino nga patas ang paghatag sa tabang ug ihiklin una ang pamolitika niining panahon sa katalagman.  (/EIM)(BANAT NEWS)