Tubig ug kuryente sa Metro Cebu hapit na mabalik

CEBU, Philippines - Maayong balita sa mga kustomers sa mga utility service providers sama sa Visayan Electric Company ug Metropolitan Cebu Water District (MCWD).

Ang VECO mipahibalo nga 94 porsiyento na sa ilang franchise area aduna nay supply sa kuryente. Samtang ang Metropolitan Cebu Water District (MCWD) mipahibalo usab  nga 89 porsiyento  o 179,000 cubic meters nga tubig na ang ilang  masuplay pagbalik.

Matud pa sa MCWD advisory nga gipadala sa Banat News nga pagka alas 4:30 sa hapon kagahapon, nga naayo na ang ilang wellfields sa Liloan hinungdan nga nisaka na ang ilang supply sa tubig.

Mayoriya sa supply nahibalik na sa Banilad padung sa uptown Cebu City, Guadalupe, Lahug ug Lapulapu City pagka buntag kagahapon

Samtang ang VECO sa ilang advisory nga giluwatan pag-alas 6:00 sa gabii nga ang nahabilin nga 6 porsiyento nga wa pa mabalik 16 megawatts na lang. Ang mga nangaguba nga lateral ug poste mao ang rason nga aduna pay ubang lugar nga brownout lang gihapon.

Sa laing bahin, matud pa sa National Grid Power Corporation, ang power supply sa maong mga lugar na-stable na human naayo na ang tulo nila ka transmission lines. (/EIM) (BANAT NEWS)