Kuryente napawong sa lalawigan sa Sugbo

CEBU, Philippines - Ang super typhoon Yolanda nakaguba sa nag-unang power ug  communication installation dinhi sa Sugbo atol sa pagkusokuso niini kagahapong adlawa.

Ang Smart ug Sun Communication ug Visayan Electric Company ( VECO) na-trip off  human hapsi sa  kusog  nga hangin ug ulan dinhi sa Metro Cebu Area.

Ang representante sa Smart Communication Atty. Jane Paredes sa usa ka interview sa radyo miingon nga ang Smart communication ni-trip off tungod sa kakulang og power supply human usab maputol  ang kuryente sa VECO.

Sumala  pa ni Paredes nga ang Metro Cebu nakasinati og brown out hinungdan nga napugos sila sa paggamit og generator sets nga kuwang  og  kusog  sa pagpaandar sa ilang transmitter operations.

Ang tigpamaba sa Capitol  Ethel Natira mitug-an nga walay suga ang  kalungsoran sa habagatang bahin sa lalawigan sa Sugbo tungod kay  98 porsiyento sa Cebeco 3 napawong. Bugtong ang lungsod sa Balamban lamang maoy nahatagan  og supply sa kuryente kay wala man sila makasinati og problema sa maong lugar.

Wala usay supply sa kuryente ang area ubos sa Cebeco 2 nga nagsupply og 11 ka mga lungsod gikan sa  Compostela hangtud sa Tuburan ug sa syudad sa Danao ug Bogo. Wala usab  makakuha og supply sa kuryente ang mga lugar ubos sa Cebeco 1 nga gilangkoban sa lungsod sa Barili, Dumanjug, Ronda, Alcantara, Moalboal, Badian, Alegria, Ginatilan, Oslob, Alcoy, Boljoon,  ug Santander. Apan ang lungsod sa Argao, Sibonga, Dalaguete ug syudad sa Carcar  maoy may supply sa kuryente. (/WC)(BANAT NEWS)