3 ka sunog kapin P400 mil ang danyos

CEBU, Philippines - Mikabat  sa dul-ang  tunga sa milyon ang danyos sa managlahing sunog nga miigo sa lalawigan ug dakbayan sa Sugbo sa miaging adlaw.

Ang  mga  biktimang  nasunogan  mao  ang  magtiayong Panfilo Arcillas  ug Eleuteria Arcillas sa barangay Daan  Tabogon, lungsod  sa Tabogon, ug Jonicio Tabacan  sa Holy Child subdivision sa  barangay  Tabunok, dakbayan  sa Talisay.

Naabtan na lang sa magtiayong Arcillas nga  naugdaw na  ang  ilang  balay  sa ilang  pag-abot  gikang  nanagkot   sa  menteryo sa barangay Daan Tabogon sa lungsod sa Tabogon pasado alas 9:00 sa miaging gabii.

Base sa imbistigasyon nga gihimo ni SPO3 Epifanio Comedido nga ang kayo didto magsugod sa sala sa balay sa magtiayon. Nagtuo ang kapolisan nga faulty electrical wiring ang hinungdan sa maong sunog.

Matud pa nga gikan sa menteryo ang managtiayon   nga  mibisita sa mga patay na niini nga mga kaliwat.

Nabantayan na lang ni Panfilo nga nasunog na ang ilang balay ug gisuwayan unta niya og pawong ang main switch sa ilang balay apan wa gyud madala  kay dali kaayong mikatap ang kayo.

Ang danyos sa maong sunog mikabat og P400 mil  dala na sa mga appliances sa magtiayon. Samtang napalong dayon ang sunog nga miigo sa balay  ni Tabacan  didto sa Holy Child Subdivision sa barangay Tabunok, dakbayan sa Talisay.

Gibanabana  sa mga  bombero  nga  mikabat  lang  og P8 mil  ang  danyos  sa nasunog  nga  balay  ni Tabacan.

Ang  ikatulong  sunog  mao  ang  didto   sa sitio Cabantan, sa Barrio Luz sa dakbayan sa Sugbo. Usa ra ka balay ang naugdaw sa maong sunog kansang  kantidad  sa danyos  ug  ang  tag-iya  wala  pa maila  sa  mga  bombero.

Hinuon   walay gikatahong naangol sa maong mga  sunog. (/WC) (BANAT NEWS)