Nawong napikas

CEBU, Philippines - Maayong pagkapikas sa nawong sa usa ka gwardya sa munisipyo sa lungsod sa Tudela human kini gitigbas sa usa ka mananagat hinungdan sa iyang kamatayon sa barangay Villahermosa sa lungsod sa Tudela sa alas 9:00 sa miaging gabii.

Ang biktima naila nga si Alfredo Estremos, 58, minyo ug kasamtangang nagtrabaho isip job order nga gwardya sa munisipyo molupyo sa barangay Villahermosa sa lungsod sa Tudela.

Samtang ang suspetsado naila nga si Eduardo Belarmino Marañan, 34-anyos, nga usa ka mananagat ug molupyo sa samang lugar.

Base sa imbestigasyon sa kapolisan nga ang biktima ug ang suspetsado naglalis dihang padulong na kini motrabaho isip gwardya sa munisipyo. Tungod sa kainit sa ilang panaglalis ang suspetsado mitigbas sa biktima sa iyang nawong gamit ang iyang sundang nga may gitas-on nga 25- pulgadas.

Human sa maong hitabo mitahan sa iyang kaugalingon ang suspetsado ug miangkon kini sa kapolisan nga siya gyud ang nagtigbas sa biktima.

Mitahan ang suspetsado sa kapolisan pinangulohan sa hepe sa Tudela Police Station nga si  Insp. Jonas Tahanlangit.

Gitahan sab sa suspetsado ngadto sa kapolisan ang iyang sundang nga nagkadugo pa nga maoy gigamit niini sa pagtigbas sa nawong sa biktima.

Kasamtangang gitanggong sa Tudela Police Station ang suspetsado aron mapasakaan kini og kasong murder. (BANAT NEWS)