CEBU, Philippines - Ang kalig-on sa pundasyon ug sa yuta nga gitarokan sa edipisyo maoy makapabarug niini nga gamay ra og kadaot kun linogon. Kini ang gipadayag ni Konsehal Efren Herrera nga usa ka civil engineer ug kontraktor sa iyang propesyon nga nahinabi sa Banat News.
Matud pa niya nga maoy hinungdan nga sa dakbayan sa Lapulapu gagmay ra og kadaot ang mga building dihang gitay-og sa 7.2 magnitude nga linog tungod sa kalig-on sa pundasyon ug ang kagahi usab sa yuta nga gitarokan niini.
Si Herrera mipasabot nga gahi ang nahimutangan sa mga edipisyo sa dakbayan kay sagad niini mga bato ug dili ordinaryong yuta.
Gipasabot ni Herrera nga usa usab kini sa mga hinungdan sa dakong kadaut sa mga edipisyo sa lalawigan sa Bohol sanglit humok ang yuta sa maong lugar.
Mipasabot usab siya nga ang mga building nga puthaw ang pundasyon, kasagarang matandog kun linogon mao ra ang kisame , ug bongbong.
Si Herrera miingon usab nga ang dali nga moliki kun linogon mao ang finishing sa bongbong apan dili ingon nga mahunlak dayon ilabi na kun lig-on ang mga haligi ug mga sakbayan sa usa ka estraktura. (BANAT NEWS)