Comm. Padaca mimando sa kasundalohan nga sigurohon ang kahapsay ug kalinaw

CEBU, Philippines - Mibisita si Commissioner Grace Padaca sa Camp Lapu-Lapu sa Central Command atol sa send off ceremony sa mga kasundalohan ngadto sa lalawigan sa Sugbo kagahapon sa buntag.

Si Padaca miingon sa mga sundalo nga gikinahang lang ang ilang presenya aron sa pagpatunhay sa kahusay ug kalinaw sa eleksyon karong adlawa.

Midugang si Padaca nga importante nga mahibalo ang mga magtutudlo nga naa ang kasundalohan ug kapolisan nga andam moalagad sa katawhan.

Sumala pa ni Padaca nga ang mga magtutudlo nga maoy mga Board of Election Teller natudloan na usab sa Comelec sa ilang gimbuhaton. Matud niya nga ang mga magtutudlo mamahimong abusohon sa mga kandidato nga dili makadawat sa ilang kapildihan.

“Our teachers, they can be the victims sometimes of the candidates who cannot accept loosing easily,” dugang ni Padaca.

Matud ni Padaca nga dili angay huna-hunaon sa katawhan nga ang piniliay sa barangay mao ang pinaka-init nga eleksyon sa nasud kay dili kini ang batasan ug kultura sa usa ka Pilipino.

Giawhag usab ni Padaca ang katawhan nga pahimuslan ang tsansa karong adlawa aron mausab ang panagway sa atong nasud pinaagi sa pagpili sa mga tawong angayan sa posisyon.

“Dapat po ay we seize the opportunity na mabago pa ang ating bayan. At lalong lalo na maiwasan ang kahirapan sa ating bansa,” pulong pa ni Padaca.

Samtang si Lt. Gen. Roy Deviraturda sa Central Command mipahimangno sa mga sundalo nga kinahanglan mamahimo silang ehemplo sa maayong sundalo sa bisan unsang panahon. (BANAT NEWS)