Birhen sa Mandaue nagmilagro?

CEBU, Philippines - Naukay ang mga molupyo sa Almers Compund sa Tabok, dakbayan sa Mandaue sa kadaghan sa mga tawo nga midagsa sa maong lugar tungod sa gikatahong birhen nga nagmilagro.

Ang presidente sa Almers Compound Neighborhood Homeowners Association nga nahinabi sa Banat News nga si Mercy Tundag miingon nga dakong kahasol sa compound ang pagdagsa sa mga tawo.

Miingon si Tundag nga daghang mga tawo nga moabot sa ilang compound nga gikan pa sa layong lugar aron magpakisayod kung tinuod ba nga nagmilagro ang birhen.

Tungod niini nagbuhat pa sila og petisyon nga papahawaon lang sa  maong lugar ang maong imahin ug ang nagdala niini kay usa man ka private property ang maong dapit ug wala mananghid kanila ang nagdala sa maong birhen.

Si Bishop Clarrisso Benito Alvarez sa Apostolic Catholic Church nga nahinabi sa Banat News miingon nga wala siya mismo makasinati sa maong milagro ug ang mga tawo na ang nagtaho kaniya nga adunay nagmilagro.

Matud pa sa mga taho nga adunay usa ka babaye nga makililimos nga nanaygon ug gani gitagaan og usa ka peso sa gidaygonan niini sa Paradise Home sa barangay Tabok.

Si Carmencita Botir ang tag-iya sa balay nga gisak-an sa birhen miingon nga gipasaka niya ang birhen sa iyang panimalay tungod kay mibalibad ang mga opisyal sa kapilya sa Romano Katoliko nga adto ibutang ang maong birhen.

Apan siya mismo miingon nga wala siya makakita sa milagro apan gihangyo niya ang kadagkoan sa Apostolic Catholic Church sa pagpasaka sa birhen sa iyang balay kay masakiton siya og guiter.

Apan ang silingan sa pamilyang Botir nga si Eladion Alesna Dian miingon nga siya mismo dili kombinsido nga nagmilagro ang birhen kay sukad sa pag-abot niini sa panimalay sa mga Botir wa man siya’y namatikdan nga milagrong nahitabo.

Dihang gipangutana sa Banat News ang Obispo sa Apostolic Catholic Church nga si Bishop Alvarez kun unsa ang mensahi sa birhen nga gikatahong nagmilagro. Siya  miingon nga buot sa birhen nga mobalik ang mga tawo sa sabakan sa Diyos.

Panawagan sa maong Obispo nga mag-ampo ang mga tawo sa rosaryo sa matag adlaw.

Si Jundee Ayuda nga molupyo sa Canduman dakbayan sa Mandaue miingon nga pagkadungog niya nga dunay birhen nga nagmilagro wa maglangay ug miadto sa Almers Compound aron masuta kun unsa kini ka tinuod. (/WC) (BANAT NEWS)