Magpapatigayon misang-at og reklamo batok sa kanhi Barangay Kapitan
CEBU, Philippines - Usa ka magpapatigayon sa dakbayan sa Sugbo nga nangita og pwesto alang sa negosyo sa isla sa Camotes nakautingkay hinuon og anomaliya sa usa ka barangay.
Si Crisologo Reyes nga taga barangay Bulacao, dakbayan sa Sugbo ang nisang-at og reklamo sa buhatan sa Ombudsman batok ni kanhi kapitan Ronillo Reales ug kanhi tresurero Filipino Roche sa Lanao, Pilar, isla sa Camotes.
Matud pa ni Reyes nga sa mubo niya nga pagpuyo sa lugar samtang nangita og pwesto alang sa negosyo ug kapuy-an, iyang nahibaw-an ang mga giingong anomalosong transaksiyon ni Reales ug Roche base sa report sa Commission on Audit.
Nahipos ni Reyes ang mga dokumento sa iyang pagsusi sa buhatan sa municipal accountant aron pagsuta sa nadawat niya nga impormasyon.
Ang dokumento nagbutyag sa giingong mga kahiwian sa paggasto sa pundo sa barangay atol sa pamunoan ni Reales niadtong 2008.
Hangtud karon, giingong wala pa na-liquidate sa mga kanhi opisyal ang ubang mga transaksiyon.
Nunot niini, gitugyan ni Reyes ang mga nahipos niyang dokumento sa mga imbestigador sa buhatan sa Ombudsman.
Susamang reklamo ang gipasaka usab sa usa ka James Bernales nga taga dakbayan sa Sugbo gihapon. Si Reales kandidato sa pagka-kapitan sa umaabot eleksiyon sa barangay karong Lunes. (BANAT NEWS)
- Latest
