Lalaki nga nagtangkil og revolver napriso

CEBU, Philippines - Napriso  ang  usa ka  lalaki  human  sikopa  sa iyang  mga  silingan  gumikan  sa iyang  pagdala  og  armas de fuego didto sa barangay  Dumlog, dakbayan sa Talisay  sa  miaging  adlaw.

Ang suspetsado mao si Cesar Liwanag, 28, taga sitio Litmon sa nahisgutang barangay kinsa  nabawian  sa kalibre  .357 revolver nga dunay tulo ka mga buhing bala.

Nag-atubang  kini  karon  sa kasong illegal possession of firearm ug kalapasan sa Comelec gun ban.

Sukad sa pag-implementar sa Comelec gun ban niadtong Septiyembre 28, 2013 alang sa barangay election karong Oktubre 28, 2013 duha na ka suspetsado ang nasikop sa kapolisan sa dakbayan sa Talisay nga nakalapas niini.

Una  niini  si Arthuro Fiel nga taga barangay Tulay, lungsod sa Minglanilla nasikop sa kapolisan sa Talisay niadtong unang semana niining buwana didto  sa barangay Tabunok.

Naimbargohan siya og usa ka kalibre .22 magnum revolver nga dunay tulo ka mga buhing bala. Apan si Fiel nasayrang  nangalyas og  ngalan kay  dili  siya Arthuro Fiel  kon dili Aaron Fiel base sa imbestigasyon sa kapolisan. Giingong   sakop  usab  kini   sa Alpa Kappa Rho nga nakapatay   kaniadtong tuig 2006 ug nakaserbisyo  na sa Second Chance sa barangay Kalunasan. (BANAT NEWS)