Bana sa konsehal gipatay sa kadumot nga tanod
CEBU, Philippines - Dumot ang hinungdan nga gipusil sa usa ka tanod ang bana sa numero uno nga konsehal sa barangay Maharohay sa lungsod sa Medellin atol sa barangay assembly sa miaging hapon .
Si SPO3 Eufrosina Aguisanda Jr. miila sa biktima nga si Illuminado Ybañes, 55 , lumolupyo sa barangay Maharohay, Medellin.
Samtang ang suspetsado naila nga si Edgar Tumara alyas “Eddieâ€, 52, minyo, barangay tanod sa barangay Maharohay.
Matud pa ni SPO3 Aguisanda nga gitinuod na lang sa suspetsado ang pamasangil kaniya sa biktima nga gipusil siya sa suspek sa milabay’ng mga adlaw.
Sumala pa ni SPO3 Aguisanda nga gihimakak sa suspek ang pasangil nga iyang gipusil ang biktima.
Kay matud pa sa suspek nga kun gusto pa niya kining buhaton dugay ra unta niya kining gipusil kay moagi man kini tungod sa ilang balay kada adlaw.
Matud ni Aguisanda nga nagpahigayon og barangay assembly ang mga opsiyal sa barangay Maharohay ug didto na ang biktima sa sulod sa basketbolan dihang naabot ang suspetsado.
Sa pag-abot sa suspetsado gipusil niini sa upat ka higayon ang biktima ug tulo ka bala niini nakaigo sa nagkalainlaing bahin sa lawas sa biktima.
Nakuhaan pa og hulagway ang suspetsado nga mitudlo sa biktima samtang nagbuy-od na kini ug miingon pa nga nakabalos na gyud siya.
Daling milayas ang suspetsado human sa maong hitabo samtang dali usab nga gidala sa Cebu Provincial Hospital sa dakbayan sa Bogo ang biktima apan gideklarar nga dead on arrival kini.
Samtang gi-alerto na karon sa kapolisan ang pantalan sa Pulang Bato ug sa Maya nga posibling exit point sa suspetsado sanglit lumad man kini nga taga-Leyte.
Apan matud pa sa kasayoran nga nahipos sa kapolisan nga ang suspetsado anaa nagtago-tago sa bukirang bahin sa Medellin ug padayon nila kini nga gipangita .
Samtang matud ni SPO3 Aguisanda nga mimando na ang hepe sa Medellin Police Station nga hingpit nga bantayan sa kapolisan ang maong lungsod ilabi na nga nagsingabot na ang eleksyon. (/WC) (BANAT NEWS)
- Latest
