Duha ka Police Chiefs ‘nakasab-an’ ni Gillamac

CEBU, Philippines - Si Provincial Police Director Sr. Supt. Noel Gillamac nasagmuyo sa duha ka hepe sa kapolisan sa duha ka mga lungsod sa lalawigan sa Sugbo tungod sa kapakyas nila pagpahibalo gilayon sa iyang opisina sa mga krimeng nahitabo sa ilang area of responsibility.

Ang maong mga hepe mao ang hepe sa Sibonga Police Station nga si Chief Insp. Bonifacio Tecson ug ang hepe sa Medellin Police Station nga si Chief Insp. Fructoso Lim.

Matud pa ni Gillamac nga si Lim napakyas sa pagpahibalo niya nga dunay kolektor nga gitulis sa Medellin atong miaging adlaw nga misangpot sa kamatayon sa kolektor.

Matud pa nga didto na nakahibalo si Gillamac sa maong panghitabo sa media ug wala gyud makapahibalo ang hepe sa Medellin kalabot niini. Samtang ang hepe sa Sibonga Police Station sab napakyas sa pagpahibawo kang Gillamac sa pagpamusil patay sa usa ka konsehal.

Nasagmuyo si Gillamac kay wala makatuman ang maong mga hepe sa iyang direktiba nga kinahanglan ipahibalo gilayon kaniya ang mga krimin nga nahitabo sa ilang mga area of responsibility.

“Some of our COP’s can’t fully comply with the instruction,” matud pa ni Gillamac.

Gimandoan ni Gillamac ang duha ka hepe sa pagsumiter og kompletong taho sa maong panghitabo ug hayan mag-atubang og imbestigasyon ini og kasulbad na sa maong mga krimen.

Samtang iapil na ang barangay Manatad sa lungsod sa Sibonga sa Election Watchlist Areas (EWAs) tungod sa maong hitabo pagpusil patay kang Konsehal Gomersindo Sabanal.

Hagit ni Gillamac kang Tecson nga ipakita niini nga kaya niya nga protektahan ang mga tawo ug mahatagan og hustisya ang pamilya sa biktima. (/EIM) (BANAT NEWS)