Polis ug Comelec pulos nangandam sa election

CEBU, Philippines - Gipangandaman sa kapolisan sa Mandaue City Police Office (MCPO) ug Commission on Elections (Comelec) ang  gitakdang barangay election karong Oktubre 28 niining tuiga.

Si MCPO  Director Senior Superintendent Petronile Baldebrin nga nahinabi sa mga tigbalita  kagahapon miingon   nga lakip sa ilang gipangandaman mao ang pagdestino og mga polis nga mopatuman sa kahapsay ug kalinaw sa adlaw sa maong kalihokan.

Matud pa ni Baldebrin nga gawas sa mga polis ilang ilakip ang mga force multiplier  nga moabag sa pagbantay sa panahon sa piniliay.

Midugang  siya  nga  magdistino  usab  siya   og mga sakyanan atol sa maong adlaw nga maoy kargahan sa mga ballot boxes ug election paraphernalias. Dugang pa ni Baldebrin nga mitakda  pa sila og dugang panagtigom sa sunod nga mga adlaw alang sa paghingpit na gayod sa ilang pagpangandam sa umaabot nga barangay election.

Si Atty. Ann Fleur Gujilde nga maoy  Comelec election officer sa dakbayan miingon nga lakip sa gihimo nilang pagpangandam mao ang mga magtutudlo nga madestino isip mga Board of Election Inspector (BEI)  sa maong  piniliay.

Sila adto ibutang  sa nagkadaiyang publikong tulunghaan sa kabarangayan nga maoy nagsilbing polling precinct sa maong piniliay nga pagahimoon. Sa matag polling precinct  sila  maoy   mohan-ay   ug  mopahiluna   sa mga precinct number ug makita usab ang listahan sa mga ngalan sa matag botante nga magdala sa ilang series number. (BANAT NEWS)