Dike ang gikinahanglan sa mga molupyo sa Talisay

CEBU, Philippines -  Ang  mga residenteng apektado sa dagkung balud diha sa sitio Psalm Base, barangay Poblacion, dakbayan sa Talisay nanghinaot nga buhatan sila og laing dike aron dili sila mabanlas sa bawod. Si Arialne Layar, 44, usa  sa  mga  nanimuyo sa  maong  lugar mibutyag nga 26 ka tuig na ang iyang pamilya sa maong lugar apan karon pa sila makasinati sa grabe ka dagku sa mga balud nga mihapak ug miguba sa ilang balay. Matud ni Layar nga gibati na sila og kahadlok ug gani wala na sila’y kinatulgan sa pagpaminaw sa mga  hapak  sa balud.

Si Layar ug uban pang mga residente sa lugar nagkanayon  nga uyon silang ibalhin sa kagamhanan sa siyudad apan unta nanghinaot silang dili  daplin sa sapa ang  relocation site.

Apan sa pagkakaron kung dili pa sila mabalhin nanghinaot silang buhatan og laing dike ang ilang lugar nga makasagang sa dagkung balud. Gibutyag ni Layar nga sobra na sa 20 ka tuig ang dike sa ilang dapit  ug gani  mabantayan nga nag-anam-anam  kini og katimpag.

Matud usab ni Layar nga kung mahurot og katimpag ang maong dike direkta nang mohapak ang  mga  balud  sa ilang mga balay ug siguradong mahurot na sila og kabanlas.

Gibutyag usab sa ubang residente sa lugar nga si Bise Mayor Romeo Villarante mihatag kanila og 15 ka sakong mga semento apan giingong dili kini kaigo sa buhatong dike.

Si Villarante nga nahinabi sa mga tigbalita nagkanayon nga susihon sa kagamhanan sa siyudad ang mga lugar nga apektado aron  sila  kahatagan  og  hinabang. Apan sa pagkakaron naghuwat pa sila sa rekomendasyon gikan sa City Social Welfare and Development (CSWD). Sa ulahing talaan kagahapon sa CSWD mikabat sa 490 ka pamilya ang apektado sa dagkung balud sa lima ka mga barangay.

Ang mga naapektohan lima niini sa barangay Pook, duha sa barangay Biasong, 33 sa barangay Cansojong nga gilangkuban sa duha ka mga sitio nga mao ang Asan ug Mahayahay.

Sa Dumlog  may 160  nga gilangkuban sa duha ka sitio nga mao ang Litmon ug Kagang, 290 sa barangay Poblacion nga gilangkuban sa tulo ka mga sitio nga mao ang Kalubihan, Mahayahay ug Psalm Base.

Matud ni Solana nga ang siyudad mihatag og bugas ug mga sardinas ngadto sa mga biktima isip pasiunang hinabang.

Miingon  siya  nga  posibleng ang kagamhanan sa Talisay mohatag usab og gamay nga pinansiyal nga hinabang sa mga biktima apan nagpahigayon pa ang ilang buhatan og assessment niini.  (BANAT NEWS)