Bantay Dagat may speed boat batok sa illegal nga mananagat

CEBU, Philippines - Gipaabot nga molambo ang kampanya sa Bantay Dagat Task Force sa dakbayan sa Sugbo kay aduna na sila’y bag-ong speed boat nga magamit paglutos sa mga illegal nga mangingisda.

Ang bag-ong speed boat nga nagkantidad og P980,000 gipalit gikan sa kwarta sa Local Disaster Risk Reduction Management Office ug gihatag ngadto sa Bantay Dagat.

Si Koronel Ranulfo Sebusa nga maoy executive director sa Bantay Dagat nahinangop kaayo nga nakaangkon na ang iyang opisina sa maong speed boat nga magamit pagpatrolya sa kadagatan.

Si Alvin Santillana nga operations officer sa Local Disaster Risk-Reduction Management Office mitug-an sa mga reporters nga nahukman nila nga tabangan ang Bantay Dagat Task Force nga dugay ra nga nangandoy nga makabaton sa maong sakyanan.

Ang Bantay Dagat wala gayo’y budget nga gihatag kay nabutang ra kini ubos sa Office of the Mayor mao nga nagsalig ra kini og dunay gahin nga ihatag para sa ilang opisina.

Ang Bantay Dagat wala na kaayo’y agi sa pagsakmit sa mga isda nga kuha sa illegal nga pamaagi ug nangabot dinhi sa Sugbo gikan sa ubang mga dapit, ilabi na sa Zamboanga.

Kini tungod kay daghang mga magpapatigayon og isda nanghangyo nga sila dili kaayo pit-on sa paghimo og kanunay nga kampanya.

Ang kanhi pangulo sa Bantay Dagat nga si Jojo dela Victoria gipatay human nga kini mihimo og pagpangsakmit sa mga isda nga kuha sa illegal nga paagi. (/WC) (BANAT NEWS)