Benedicto milangkat sa Umami Bowl Award Tinagik

CEBU, Philippines - Call it beginner’s luck!

Mao pa kadtoy pagsalmot sa Benedicto College sa “Umami Culinary Challenge–Visayas” apan nasigpaw dayon nila ang usa sa mga prestihiyosong pasidungog sa natad sa pagpangluto dinhi sa nasud – ang “Umami Bowl Award” -  niadtong Septiyembre 21 didto sa SM City Cebu Trade Hall.

Itunol lamang ang maong pasidungog sa tulunghaan nga maoy makatigom og labing taas nga hinugpong nga puntos sa tulo ka kategorya sa maong tigi.

Ang mga tinun-an sa Department of Hospitality Management nga silang Kerreljoy Aresgado, Krizia Michelle Irasga, ug Kathleen Carl Gadgode maoy milabni sa unang ganti alang sa “My Own Umami Creation.”

Ang hagit mao nga makasukad sila og “signature umami dish.” Matud pa nga ang maong sud-an kinahanglang labing lamian sa tanang salmot ug labing taas og nutritional value.

Umami maoy giisip nga ikalimang matang sa lami o lasa, gawas sa parat, tam-is, aslom ug pait. Gihulagway kini sa Tinagalog nga “malinamnam,” samtang dinhi sa ato wala kini tukmang katugbang o hubad, busa taman na lang sa “lamian” ang gibalikbalik nga sangpit niini.

Samtang silang Maria Cristina Zapatalo, Tricia Me Jopia, ug Ralph Louther Lambo nakakuha sa ikadung luna sa “Best in Filipino Umami Dish.” Ang tahas ning maong kategorya mao nga makasilbi sila sa talad sa labing lamian nga sud-ang Pinoy ginamit ang mga batid na nilang sangkap.

Sa laing bahin, silang Jelita Penserga, Marnelli Lisondra, ug Cathlia Rose Solarta nakigtigi sa “Healthy Asian Umami” nga kategorya diin gipangayo sa mga hurado nga sila makahukad sa labing lamiang sud-ang isda.

Saysay sa ilang coaches nga silang Chef Ana Lisa Augosto ug Chef Dave Ponce, usa lamang ka semana ang ilang gihimong pagpangandam, o kadtong semanaha  sa wala pa mahitabo ang kompetisyon, kay diha pa sila’y pagduhaduha kun mosalmot ba gyud sila. “The invitation came in late, but because the primary purpose was for sheer exposure sa mga students, mao to we decided nga we should give the event a try,” paambit sa duruha.

Total kuno, nothing to lose man ang Benedicto College tungod kay “baby” pa ang Department of Hospitality Management niini ug gilantaw sab nila nga labing lig-ong katigi ang SEACAST sa University of Cebu-Maritime Education and Training Center sa Mambaling Campus nga maoy kampeyon sa milabay’ng tuig.

Matud pa ni Augosto: “The motivation was not really anchored on how to win, but we coaches emphasized to students they must possess the drive to compete.”

Alang ni Department of Hospitality Management chairman James Toledo, wala na gani sila magtoo pa nga makadaug bisan sa asa mang kategorya tungod kay gawas nga “bata” pa ang ilang departamento, 21 sab tanan ka tulunghaan ang nagtigi.

“We weren’t really expecting more than the second-place finish in the Best Filipino Umami Dish category. Okay na gyud kaayo mi sa second place. At least, we’re not empty-handed,” saysay niya.

“But when the school was adjudged overall winner, it came as a big surprise. Imagine 21 schools gud tanan (lakip ni sa Hercor College sa Iloilo nga nakigtigi batok International School for Hotel and Restaurant Management sa Cebu alang sa Visayas Showdown sa Best Filipino Umami Dish). The Umami Bowl Award is already a bonus for us nga first time pa ni-join,” matud ni Toledo.

Sa nakalabay’ng tuig, ang Benedicto College sa Barangay Bakilid, Mandaue City miapil sa table setup, busa matawag nga labing una ni nilang higayon nga pagsalmot kun tigi na sa kahibalo sa pagpangluto ang hisgutan.

Lakip sa nakigtigi sa maong mainiton, makugihon, mabungahon, ug mabulukong indigay sa pagpangluto mao ang Britech Interface Computer College, Cebu Eastern College, Cebu Institute of Technology – University, Cebu Mary Immaculate College, Cebu Roosevelt Memorial Colleges, Cebu Technological University (San Francisco, Tuburan, Moalboal, Daanbantayan, Danao), Felipe Verallo Memorial Foundation, Inc.; Holy Name University – Tagbilaran, International School for Hotel and Restaurant Management, Lapu-Lapu City College, Mandaue City College, University of Cebu (Maritime Education, Lapu-Lapu and Mandaue, Main Campus), ug University of Southern Philippines Foundation.

Ang 2013 Aji-no-moto Umami Culinary Challenge-Visayas usa ka inter-school culinary excellence showdown diin gipanghingusgan sa tiggama sa maong produkto ang pagpasabot nga wala’y angay kabalak-an sa paggamit og vetsin, ug gani mas makapalami kini sa pagkaon ug makapahimsog tungod sa sangkap niining glutamate. Nakakat-on sab ang mga tinun-an og mga bag-ong pamaagi sa pagmatuto og pamatigayon may kalambigitan ang pagkaon. (BANAT NEWS)