Pugante misukol sa polis gipatay

CEBU, Philippines - Usa ka pugante nga gituohang  gun for hire ug wanted sa kasong rape ang napusilan patay sa kapolisan human kini makiglayog sa pulis nga modakop unta kaniya didto sa barangay Jaclopan sa dakbayan sa Talisay sa alas 8:30 sa miaging gabii.

Giila  sa kapolisan ang biktima  nga si Rolando Abellana Barlejo, hingkod,  ug wanted sa kasong rape. May pending  usab  siya nga warrant of arrest ug giingon nga miiskapo  sa prisohan sa Minglanilla duha na ka tuig ang milabay.

Matud ni Chief Supt. Romeo Santander ang hepe sa City Intelligence Branch sa Cebu City Police Office nga sa sayo  pa adunay naka-tip kanila nga si Barlejo naa sa maong lugar ug mogawas lang kini og magabii nga armado aron magpundok sa uling niini ug mouli ra usab dayon.

Base sa maong impormasyon giumol nila ang  usa ka team inabagan sa mga elemento sa Talisay City Police Office aron sa pagsuta sa maong impormasyon.

Human nila masuta  nga positibo ang maong impormasyon midiritso sila sa Jaclopan ug nakita nila si Barlejo nga nagpundok sa iyang  uling.

Matud ni Santander nga dihang nagpaila ang kapolisan, miisa sa kamot si Barlejo apan dihang posasan na unta kini nakiglayog kini kang PO3 David Naraja, gani naka-angkon og bun-og ang maong polis. Aron  sa  pagpakalma  kang Barlejo,  gipusil  ang tiil  niini  sa laing  polis,apan mibunot pa gyud kini sa iyang armas nga kalibre 45 hinungdan nga gipusil na lang kini  sa dughan ug  diha-diha  namatay. Gibutyag ni Santander nga ilang tumong nga madala ang suspetsado nga buhi apan misukol man kini busa  ila  na lang  gipatay.

Si Barlejo matud pa ni Santander gituohan nga usa ka gun for hire ug duha na ka tuig nga nagtago-tago human sa iyang pag-eskapo sa prisohan  sa  Minglanilla. (BANAT NEWS)