Pelaez miprotesta sa pagtapon sa mga Radaza sa LP

CEBU, Philippines - Gisumiter ni Liberal Party (LP) District Chairman Efrain Pelaez ang iyang protesta batok sa Deretso team ni Lapulapu City Mayor Paz Radaza human kini nanumpa  ubos sa   partidong Liberal sa milabay’ng adlaw didto sa Malacanang.

Matud pa ni Pelaez usa kini ka kalapasan sa lagda sa ilang partido nga modawat dayon og mga kaalyado nga wala moagi sa LP District ug Provincial Chairman nga si Cebu Gov. Hilario Davide III.

Ang matag kandidato nga motapon ngadto sa ilang (LP) partido nagkinahanglan og  rekomendasyon gikan sa mga lokal nga opisyal sa partido sa dili pa kini mohurar.

Gumikan niini kagahapon sa buntag gisumiter ni Pelaez ang iyang protesta ngadto sa ilang LP main headquarters sa kaulohan aron kwestiyonon ang pagpapanumpa sa grupo ni Radaza ngadto sa LP sa milabay’ng adlaw.

Nagduda si Pelaez nga kini maoy laing estratehiya sa mga Radaza nga maproteksiyonan niini ang ilang mga kaso sa corruption nga iyang gipasaka   nga nagpabiling pending hangtod ning panahona.

Samtang si Angel Rodriguez sa iyang bahin wala mokomentaryo sa maong pagtapon sa mga Radaza ngadto sa LP apan igo lamang kining mipadayag nga kinahanglan moagi una kini  kang Gov. Davide  sa dili pa dawaton sa partido ang mga Radaza.

Si Pelaez ug Rodriguez sa LP maoy nangaparut atol sa milabay’ng  eleksiyon sa pagka mayor ug kongresista sa dakbayan sa Lapulapu batok nila ni Mayor  Radaza ug Cong. Aileen Radaza nga kanhi sakop sa Lakas Kampi CMD.  (BANAT NEWS)