Ang OIC, si FVR ug Duterte ray paminawon ni Misuari sumala pa sa kanhi MNLF Commander

CEBU, Philippines - Ang kanhi MNLF Commander nga nakabase na karon dinhi sa Sugbo nga si Abdurajack Sandag mibutyag nga bugtong ang Organization of Islamic Conference kon OIC lamang ang makahatag og kasulbaran sa kagubot sa syudad sa Zamboanga City.

Sumala pa ni Sandag nga dako ang iyang pagtuo nga haum na karon ang panawagan ni Nur Misuari nga gikinahanglan na ang mo-interbiner sa maong kagubot sa Zamboanga ang international communities sama sa OIC.

Matud pa niya nga may basehanan ang MNLF nga lig-onon niini ang ilang baruganan sa pagpakiggubat sa gobiyerno tungod kay wala man usab gituman sa gobiyerno  ang Tripoli Agreement.

Miingon siya nga bugtong ang mga leader lang sa OIC ang paminawon ni MNLF chairman Nur Misuari aron ihunong ang pagpakiggubat sa militar.

Apan iyang gitataw nga nagtuo usab siya nga paminawon usab ni Misuari si kanhi presidente Fidel Ramos o ba kaha si Davao City Mayor Ronald Duterte alang sa temporaryong ceasefire.

Nasayran ang Malacañang misalikway sa panawagan ni Misuari nga ang international communities sama sa OIC  mointerbener na sa nahitabong gubat tali sa tropa militar ug sa mga armadong sakop sa MNLF Misuari faction. (BANAT NEWS)