MUDA-NCTU di mangayo’g omentohan ang pletihan

CEBU, Philippines - Dili mangayo og omento sa pletihan ang mga drayber ug operators sa mga pasaheroan sa Mandaue bisan pa man sa nagsunod nga pagsaka sa presyo sa produktong petrolyo.

Kini ang nasayran sa Banat Manobela kang Romeo Armamento ang pangulo sa Mandaue United Drivers and Operators Association –National Confederation of Transportworkers Union (MUDA-NCTU) nga nahinabi kagahapon.

Matud pa niya nga dili madali ang pagpangayo og usbaw sa plitehan sanglit nagkinahanglan man kini og tukmang pagtuon sa transport group, mga pasahero ug angayan usab nga ilambigit niini ang mga magpapatigayon.

Si Ahmed Cuizon nga maoy regional director sa Land Transportation Franchising  Regulatory Board (LTFRB) 7 nga nahinabi sa Banat Manobela miingon nga bisan sa mga nagsunod nga usbaw sa produktong petrolyo wala sila makadawat og petisyon gikan sa transport groups. 

Sumala pa niya, dili matagna ang pagsaka kanaog sa presyo sa petrolyo base sa ilang obserbasyon sanglit dunay panahon nga kalit mosaka ug kalit usab mous-os.

Si Armamento miingon nga sila sa transport group  mibasol sa Oil Deregulation Law nga maoy nakaingon sa pagpatuyang og pagsaka sa presyo sa mga gasolinahan.

Sa pagkakaron ang matag litro sa krudo misaka og piso kada litro samtang P1.35 usab sa kada litro sa gasolina. (BANAT NEWS)