CEBU, Philippines - Managsoon ug ig-agaw nga suspetsado sa pagdunggab sa ilang silingan sa sitio Soong 1, barangay Mactan, dakbayan sa Lapulapu sa miaging kaadlawon padayon nga gipangita sa kapolisan.
Ang gipangita mao ang managsoon nga sila si Ariel Ecoy, iyang igsoon nga si Ata Ecoy ug ang ilang ig-agaw nga si Ryan Ecoy nga pulos hingkod ug nagpuyo sa sitio Soong sa barangay Mactan sa maong dakbayan.
Si PO2 Jade Querobin sa homicide section sa kapolisan sa maong dakbayan nga nahinabi sa Banat News miingon nga ang tulo nga ilang gipangita maoy suspetsado sa pagdunggab kang Armelito Malingin Maluluy-on, 37, minyo, nga nagpuyo usab sa maong dapit.
Matud pa ni PO2 Querobin nga dugay na nga gikabangi sa biktima ang mga suspetsado ug dihang ilang nasigpatan nga naglakaw kini sa dalan, ila kining gigukod .
Si PO2 Querobin miingon nga dihang naapsan ang biktima gitabangan kini og dunggab sa mga suspek apan gumikan kay nakapanagang kini, hinungdan nga nakabaton lamang kini og mga tapsing nga mga samad dinunggaban.
Dugang pa niya nga dali nga milayas pahilayo sa maong lugar ang mga suspetsado samtang ang biktima gihatud dayon ngadto sa Mactan Doctors’ Hospital apan gibalhin kini sa Vicente Sotto Memorial Medical Center sa dakbayan sa Sugbo. Padayon pang gipangita sa kapolisan ang mga suspek. (BANAT NEWS)