P39M nga traffic lights sa Mandaue makapaluag sa kahuot sa trapiko— Cortes

CEBU, Philippines - Hingpit na nga nag-operate ang labing moderno nga traffic lights system nga nagkantidad og P39 milyones sa siyam usab ka mga nagkuros nga mga dalan sa dakbayan sa Mandaue.

Gipanglantawang dako kini og kasulbaran sa panaghuot sa trapiko sa maong siyudad ug momenus na usab ang shortage sa traffic enforcers nga idestino nga maoy gitahasan sa pagpatuman sa kahapsay sa dagan sa mga sakyanan sa matag adlaw sa kadalanan.

Kini maoy gibutyag ni Edwin Ermac, pangulo sa Traffic Enforcement Agency of Mandaue (TEAM) nga nahinabi sa Banat Manobela atol sa gipahigayon nga ceremonial switch on sa traffic light system niadtong adlaw nga Biyernes atol kini sa ika-44 ka tuig nga kasaulogan sa Charter Day sa dakbayan.

Ang ceremonial switch on gipahigayon sa nagkurus nga dalan sa A.S. Fortuna ug M.C. Briones, A.C. Cortes Avenue ug S.B. Cabahug ug dalan Plaridel.

Matud pa ni Ermac nga sa usa na lang ka intersection sama sa dalan Plaridel sa barangay Alang-Alang nga paingon sa United Nation Avenue ug A.C. Cortes Avenue nga paingon sa 1st Mactan Mandaue Bridge maoy ilang gibutangan og traffic enforcers. Dugang pa ni Ermac nga kaniadto dihang wala pa ang traffic lights magkinahanglan og daghang traffic enforcers pagbantay sa maong siyam ka intersections.

Apan karon mahimo nang ibutang sa laing dapit ang mga enforcers nga kaniadto napasagdan.

Matud ni Ermac ang mga traffic enforcers mabutang na sa mga dalan nga nagpaingon sa kabarangayan nga nakasinati og mga panaghuot sa mga sakyanan.

Si Mayor Jonas Cortes nga nahinabi sa Banat Manobela mipasabot nga dako kaayo og bintaha ang pagbutang sa modernong traffic light sanglit kauban na man niini ang pagpahimutang sa 36 ka mga CCTV camera sa kadalanan sa dakbayan.

Matud pa niya nga pinaagi sa mga CCTV camera dali na kaayo nga mamonitor  sa kapolisan, kabomberohan, Accident Control and Emergency Response Team (ACERT) Emergency Rescue Unit Foundation (ERUF) ug uban pa panahon sa emerhensiya.

Gipasabot niya nga sa pagpahimutang unya sa mga modernong traffic lights nga gigamitan pinaagi sa closed-circuit television nga camera  gawas nga aduna kini timers ug sensors  mahimo usab nga ma-monitor ang traffic situation  sa kadalanan pinaagi sa television screen nga gipahimutang sa Mandaue Integrated Response System Command Center sa kilid nga bahin sa City Hall.

Si Peter Ong, president sa Triune Electronics Systems Inc. nga maoy kontraktor nga gikontrata sa siyudad miingon ilang paningkamutan   ang paghingpit na sa operasyon sa siyam ka mga intersection sa dili matapos ang tuig 2013.

Ang adunay kabilinggan sa pangalawas sama sa buta dili maglisod sa ilang paglabang kay mabati man ang tingog nga panagsang pagtotot nga nagpasabot nga dili pa mahimong molabang ug kun paspas na ang kusog nga pagtotot nga nagpasabot kini nga mao na ang higayon sa paglabang.   

Dugang pa niya nga dili nila madali ang pagpahimutang sa mga traffic lights tungod kay nagbutang man sila og ilang kaugalingong mga poste ug wala na man nila gamita ang karaan nga mga poste sa daan nga traffic lights.

Si Ong miingon nga susamang traffic lights ang ilang gipahimutang sa Pangasinan, Nueva Ecija ug uban pa nga mga lalawigan ug ang dakbayan sa Mandaue maoy labing unang nakabaton niini dinhi sa Central Visayas.-(BANAT NEWS)