COA mikuwestiyon sa 6 porsentong patong sa gasoline

CEBU, Philippines - Ang kagamhanan sa Talisay gikwestiyon sa Commission on Audit (COA) bahin sa 6-porsyentong patong sa bayranan nila sa gasolina  sa Shell Gasoline Station sa barangay Bulacao.

Si Talisay City Public Information Officer (PIO)Vince Monterde  mibutyag nga mikabat  sa P1.6 milyones ang bayranan sa siyudad  sa gasolina sukad niadtong buwan sa Enero niining tuiga hangtud sa buwan sa Agosto.

Gibutyag ni Monterde nga sa maong bayranan lakip na niini ang 6-porsyentong patong o surcharges apan gikwestiyon kini sa COA.

Kahinumdoman nga tungod sa kadaku sa utang sa siyudad   sa Shell Gasoline Station niadtong Martes ang kapolisan ug Solid Waste Management sa siyudad naproblema  sa ilang operasyon   kay wala na mohatag kanila og gasolina ang  maong  supplier

Apan ang maong problema nasulbad dayon  human ang mayor  sa  siyudad ug supplier nagkasabot.

Si Mayor Johnny De los Reyes sa iyang bahin mibutyag  nga  gumikan  sa kadugay  mobayad  sa kagamhanan  patongan nila  og 6-porsyento  nga  tubo  ang  utang  niini.

Apan  mimando  ang  COA  nga dili pabayaran sa siyudad ang 6-porsyentong patong.

Ang nahisgutang utang sa gasolina giingong  anam-anaman kini og bayad sa siyudad.

Midugang  si  De los Reyes nga mangita sila og laing supplier nga makahatag og ubos nga presyo ug dili mopatuman og patong sa ilang  bayranan. (BANAT NEWS)