Duha naangol sa pagpamusil
CEBU, Philippines - Duha ang samaran lakip na ang usa ka criminology student sa nahitabong pagpamusil sa Barangay San Isidro, San Fernando sa miaging gabii.
Ang naangol giilang sila si Joselito Cabigon, 48, taga barangay South Poblacion sa maong lungsod kinsa nasamdan sa tuong bahin sa lawas niini human pusila sa wala hiilhing lalaki samtang sakay sa iyang Yamaha nga motorsiklo nga adunay plakang number GG 5056 samtang siya paingon na mupauli sa ilaha.
Ang mamumuno matud pa nga nakapabuto sa makatulo ka higayon hinungdan sa pagkapagan ni Abel Sayson, 19, criminology student sa Professional Academy of the Philippines (PAP) nga nagmaneho usab sa iyang motorsiklo kauban ang classmate nga si Jason Taburada.
Si Sayson nakaangkon lang ug daplis sa iyang ulo ug parehong gidala sa South General Hospital ug anaa na sa luwas nga kahimtang. Si San Fernando police chief, Chief Insp. Sarah Jane Recla, mibutyag nga personal grudge ang posibleng motibo sa pagpamusil apan magpaabot una sila ni Cabigon aron pagluwat og pamahayag. (BANAT NEWS)
- Latest