Bakasihan sa cordova gilangaw

CEBU, Philippines - Mga mangingisda sa lungsod sa Cordova nabalaka na sa dakong epekto sa oil spill gumikan kay wa nay namalit sa ilang baligyang bakasi sukad nahitabo ang bag-o lang nga trahedya sa dagat. Ang Cordova ilado sa bakasi ug uban pang lamiang seafoods.

 Matod ni Teresa Rapada, 64, tindera sa bakasi nga naguol siya gumikan kay wa na siya’y halin.

Gani ang iyang mga baligyang bakasi wa pa gyud nahalin sukad pa sa buntag kagahapon.

Matod ni Rapada nga kaniadto usa ka libo ka pesos matag adlaw ang ilang halin sa bakasi apan karon swerte na ang kinyentos nga halin. Ang ubang mga lumolupyo mibutyag nga tungod sa nahitabo mahadlok na usab sila nga mokaon og bisan unsa mang gikan sa dagat, hinungdan nga itlog, karne ug longganisa na lamang ang ilang sud-anon. 

Ang mayor sa Cordova Adelino Sitoy miingon nga di angay mahadlok pagkaon og bakasi ug isda gumikan kay luwas kini.

Gi-promote pa ni Sitoy nga ang bakasi sa Cordova lamian ug mipasiaw pang mas bright pa ang bakasi itandi sa oil spill.

“(Bakasi) is smarter than the crude oil,” nga iyang gipasabot nga ang bakasi moluklok sa ilawom sa kabatohan samtang ang oil spill atoa ra sa ibabaw maglutaw. (BANAT NEWS)