Krimen mibahar ning tuiga

CEBU, Philippines - Gibutyag  sa kapolisan  nga  mibahar  ang krimen  niining tuiga  itandi  sa tuig  2012. Si PSupt. Renato Dugan, Public information officer (PIO) sa Police Regional  Office (PRO)7 nagkanayon  nga  nahimo  kini  tungod  sa  mga  intervention  ug  mga  programa  nga  gilusad  sa kapolisan  sa rehiyon.

Sa AGIO Forum  kagahapon  didto  sa buhatan  sa Department of Interior and  Local  Government (DILG) si Dugan  nagkanayon  nga ang maong  mga  programa  nakapabahar  sa krimin  sa  rehiyon.

Ang  maong  mga programa  naglakip  sa Integrated  Police  System, police  visibility,  ug  uban  pa  nga  nakapaminus  sa kriminalidad  sa kadalanan.

Hinuon  miingon  siya  nga  resulta  usab  kini  sa pagpatuman  sa Crime  Prevention  Week (CPW)  sa  miaging  tuig.

Ang  pagsaulog  sa CPW  himoon  matag  unang  semana  sa Septiyembre  matag  tuig.

Gumikan  niini  pangunahan  sa Department of  Interior  and  Local  Government (DILG)  ang  pagpatuman  niini  sugod  sa Septiyembre 1-7.

Si  Regional  Director  Ananias  Villacorta  sa  DILG7  nagkanayon  nga  gihan-ay  na  nila ang  nagkalainlaing  kalihukan  sa maong  selebrasyon.

Midugang  si  Villacorta  nga  pinaagi  sa tema  nga “Malasakit Mo ay Kailangan Upang Krimen ay  Maiwasan,”  masabtan  unta  sa publiko  nga  ang  pagsanta  o pagpugong  sa krimin  dili  tulubagon  lang  sa kapolisan  o  sa kagamhanan  kundili  obligasyon  kini  sa tanan.

Matud  ni  Villacorta  nga  kun  magmatngon  lang  ang tawo,  kalikayan  gyud  unta  ang  mga  dagkong  krimen    nga  mahitabo  adlaw-adlaw.

Hinuon gipatuman  sa kagamhanan  ang  CPW  aron  sa  pagpahinumdom  sa  katawhan  nga  kutob  sa mahimo  likayan  nga  makahimo  og  krimen.

Gani  nagpasalamat  usab  siya sa gibutyag  sa kapolisan  nga  mibahar  na  ang  krimen  ning  tuiga  kun itandi  sa miaging  tuig  dinhi sa rehiyon 7. (BANAT NEWS)